މިބައްދަލުވުމުގައި ކުރިއަށް ގެންދެވީ، މަޖިލީހުގެ ދާއިމީ ކޮމިޓީތަކުގައި ހިމެނިވަޑައިގަންނަވާ ސިޔާސީ ޕާޓީތަކަށް ނިސްބަތްވެވަޑައިގަންނަވާ މެންބަރުންނާއި، ވަކި ޕާޓީއަކަށް ނިސްބަތްވެވަޑައިނުގަންނަވާ މެންބަރުން ތަމްސީލުކުރައްވާނެ ގޮތަށް ބަދަލުއައިސްފައިވާތީ، ކޮމިޓީގެ މުޤައްރިރު ކަމުގައި ކުރިން ހުންނެވި މެންބަރު ޕާޓީ ބަލަދުކޮށްފައިވުމުން ރައްޔިތުންގެ މަޖިލީހުގެ ގަވާއިދުގެ 132 ވަނަ މާއްދާގެ ދަށުން ކޮމިޓީގެ މުޤައްރިރު ހޮވުމެވެ. އެގޮތުން، ކަނޑިތީމު ދާއިރާގެ މެންބަރު ޢަބްދުﷲ ޝަހީމް އަބްދުލްޙަކީމް ހުށަހެޅުއްވަވާ މުލަކު ދާއިރާގެ މެންބަރު އިބްރާހީމް ނަޞީރު ތާއީދުކުރައްވަވާފައިވަނީ ހެންވޭރު ހުޅަނގު ދާއިރާގެ މެންބަރު ޙަސަން ލަޠީފްގެ ނަންފުޅެވެ. އަދި އިތުރު އެހެން ހުށަހެޅުމަކަށް ތާއީދު ލިބިފައިނުވާތީ މި ހުށަހެޅުމަށް ވޯޓަށް އެހުމުން އެވަގުތު ކޮމީޓީގައި ހާޒިރުވެވަޑައިގެން ތިއްބެވި ހުރިހާ މެންބަރުންގެ އިއްތިފާޤުން މި ނަންފުޅު ފާސްވެގެންދިޔައެވެ. މީގެއިތުރުން، ކޮމިޓީގެ މުޤައްރިރުގެ ނައިބަކަށް ކުރިން ހުންނެވި ކެލާ ދާއިރާގެ މެންބަރު އިބްރާހީމް ޝަރީފް ހުންނެވުމަށް މެންބަރުންނަށް ފެނިވަޑައިގަންނަވާ ގޮތަކަށް ވޯޓަށް އެހުމުން އެވަގުތު ކޮމީޓީގައި ހާޒިރުވެވަޑައިގެން ތިއްބެވި ހުރިހާ މެންބަރުންގެ އިއްތިފާޤުން ނައިބު މުޤައްރިރެއްގެ ގޮތުގައި ކެލާ ދާއިރާގެ މެންބަރު އިބްރާހީމް ޝަރީފް ހުންނެވުމަށް ފާސްވެގެންދިޔައެވެ.