މިއަދުގެ ބައްދަލުވުމުގައި ފުރަތަމަ ކުރިއަށް ގެންދެވީ ކޮމިޓީއަށް ރައްޔިތުންގެ މަޖިލީހުގެ ތަޅުމުން ފޮނުއްވާފައިވާ "ލ. ކުނަހަންދޫ އިންޖީނުގެ ޢިމާރާތްކުރުމުގެ މަސައްކަތާއި ނަރުދަމާގެ މަސައްކަތް ހުއްޓިފައިވާތީ އެ މަސައްކަތް އަވަސްކޮށްދިނުމަށް ގޮވާލާ ޤަރާރު" އާއި "ލ. ހިތަދޫއާއި ކުނަހަންދޫ ގުޅުވާލުމަށް ހަމަޖެހިފައިވާ ކޯޒްވޭގެ މަސައްކަތް އެއްވެސް ވަރަކަށް ފެށިފައި ނުވާތީ އެ މަސައްކަތް އަވަސްކޮށްދިނުމަށް ގޮވާލާ ޤަރާރު" ދިރާސާކުރުމުގެ މަސައްކަތެވެ. އެގޮތުން، އެ ޤަރާރުތަކުގައި ހިމެނިފައިވާ މަސައްކަތްތައް އަވަހަށްކޮށް ނިންމުމަށް ސަރުކާރަށް ގޮވާލާކަމަށް ކޮމިޓީގެ އައުލަބިއްޔަތުން ފާސްކުރެއްވިއެވެ. މި ގޮތައް ހުށަހެޅުއްވީ އުނގޫފާރު ދާއިރާގެ މެންބަރު މުޙައްމަދު ވަޙީދު އަދި ތާއީދު ކުރެއްވީ ހޮޅުދޫ ދާއިރާގެ މެންބަރު ޔޫނުސް ޢަލީއެވެ. ދެން މިއަދުގެ ބައްދަލުވުމުގައި ކުރިއަށް ގެންދެވީ ދިވެހިރާއްޖޭގެ ބިމާބެހޭ ޤާނޫނުއަށް އިޞްލާޙު ގެނައުމުގެ ބިލު ދިރާސާކުރެއްވުމެވެ. އެގޮތުން ބިލުގެ 12-1 ވަނަ މާއްދާގެ (ހ) އަދި (ށ) ކޮމިޓީން ގެންނެވި އިސްލާޙްތަކާއި އެކު ފާސްކުރެއްވިއެވެ. މީގެ އިތުރުން ބިލުގެ 13 ވަނަ މާއްދާގެ (ނ) އަށް ކޮމިޓީން ގެންނެވި އިސްލާޙުތަކާއި އެކުވެސް ފާސްކުރެއްވިއެވެ. އަދި ބިލުގެ 13 ވަނަ މާއްދާގެ (ރ) ބިލުގައި ހުށަހަޅުއްވާފައިވާ ގޮތަށް ފާސްކުރެއްވިއެވެ. ކޮމިޓީއަށް ވަޑައިގެން ވޯޓުގައި ބައިވެރިވެވަޑައިގެންނެވި މެންބަރުންގެ އަޣްލަބިއްޔަތުން މި ދެ މާއްދާވެސް ފާސްކުރެއްވިއެވެ. އަދި ބިލުގެ 3 އަދި 4 ވަނަ ނަންބަރުވެސް ކޮމިޓީގެ މެންބަރުންގެ އިއްތިފާގުން މިއަދު ފާސްކުރެއްވިއެވެ. އަދި ބިލުގެ ރިޕޯޓް ފުރިހަމަ ކުރުމަށްފަހު މަޖިލީހުގެ ތަޅުމަށް ފޮނުވުމަށް ކޮމިޓީން ނިންމެވިއެވެ.
ބައްދަލުވުމުގެ އެޖެންޑާ ބައްދަލުވުމުގެ ޔައުމިއްޔާ ބައްދަލުވުމުގެ ޚާޒިރީ© 2024 ރައްޔިތުންގެ މަޖިލިސްގެ އިދާރާA