މިބައްދަލުވުމުގައި ކުރިއަށް ގެންދެވީ، ރައްޔިތުންގެ މަޖިލީހުގެ ގަވާއިދުގެ 21 ވަނަ މާއްދާއަށް ހުށަހަޅުއްވާ އިސްލާޙުތައް ދިރާސާކުރުމެވެ. މި ހުށަހެޅުމާމެދު ކޮމިޓީގެ މެންބަރުންގެ މެދުގައި މަޝްވަރާކުރެއްވުމަށްފަހު، ހުށަހެޅުން ހުށަހެޅުއްވި ގޮތަށް ފާސްކުރުމަށް ފެންނަކަމަށް ކުރެންދޫ ދާއިރާގެ މެންބަރު ޢަބްދުޣަނީ ޢަބްދުލްޙަކީމް ހުށަހެޅުއްވިއެވެ. މި ހުށަހެޅުމަށް ހޮޅުދޫ ދާއިރާގެ މެންބަރު ޔޫނުސް ޢަލީ ތާޢީދުކުރެއްވިއެވެ. އެއަށްފަހު، ހުށަހަޅާފައިވާ އިސްލާޙުގެ ކޮންމެ މާއްދާއަކަށް ވަކިވަކިން ވޯޓަށް އެއްސެވިއެވެ. އަދި، ވޯޓަށް އެހުމުން ކޮމިޓީއަށް ހާޒިރުވެ ވޯޓުގައި ބައިވެރިވެ ވަޑައިގެންނެވި މެންބަރުންގެ އިއްތިފާޤުން މި ހުށަހެޅުން ފާސްވިއެވެ.