މިއަދުގެ ބައްދަލުވުމުގައި, 06 މޭ 2021 ގައި ރައްޔިތުންގެ މަޖިލީހުގެ ރައީސް ރައީސް މުޙައްމަދު ނަޝީދަށް އަމާޒުކޮށް ދިން ބޮމުގެ ޙަމަލާއާ ރައްޔިތުންގެ މަޖިލީހުގެ ހެންވޭރު ދެކުނު ދާއިރާގެ މެންބަރު ޙުސައިން ޝަހީމްއާ ގުޅުވައި ރައްޔިތުންގެ މަޖިލީހުގެ ރައީސް ރައީސް މުޙައްމަދު ނަޝީދު ދެއްކެވި ވާހަކަފުޅުގެ މައްސަލަ ބައްލަވައިދެއްވުން އެދި ހުށަހަޅުއްވާފައިވާ މައްސަލަ އަނބުރާ ނަންގަވާ އެ މެންބަރު ކޮމިޓީއަށް ސިޓީ ފޮނުއްވާފައިވާތީ، އެ މައްސަލަ އިތުރަށް މަޝްވަރާނުކޮށް ފައިލް ކުރުމަށް ނިންމެވިއެވެ. އެއަށްފަހު، ރައްޔިތުންގެ މަޖިލީހަށް ހުށަހެޅިފައިވާ ދިވެހި ދައުލަތުގެ ބަންޑާރަ ނައިބުގެ އިތުބާރެއް ނެތްކަމުގެ މައްސަލައިގައި ރައްޔިތުންގެ މަޖިލީހަށް ހާޟިރުވުމަށް ދެކޮޅުހައްދަވާފައިވާތީ އެއި ރައްޔިތުންގެ މަޖިލީހުގެ ގަވާއިދުގެ 182 ވަނަ މާއްދާގެ (ށ) ގައިވާ ގޮތުގެމަތިން މުޅި މަޖިލީހުގެ އިމްތިޔާޒަށާއި ޤަދަރަށް އުނިކަން އަންނާނެކަމެއްކަމުގައި ބަޔާންކޮށް ކޮމިޓީއަށް ފޮނުވާފައިވާ މައްސަލައިގައި، ބަންޑާރަ ނައިބު މަޖިލީހަށް ހާޟިރުނުވީ ލިޔުމުން ޖަވާބުދާރީ ވުމަށް އެދޭތީކަމަށާއި، އަދި ލިޔުމުން ޖަވާބުދާރީވެ މަޖިލީހަށް ސިޓީ ފޮނުއްވާފައިވާތީ، މައްސަލަ ފައިލްކުރުމަށް ނިންމެވިއެވެ. މީގެ އިތުރުން، މިނިސްޓަރ އޮފް ހައުސިންގ، ލޭންޑް އެންޑް އަރބަން ޑިވެލޮޕްމަންޓް ޑޮކްޓަރ ޢަލީ ޙައިދަރު އަޙްމަދު ރައްޔިތުންގެ މަޖިލީހުގެ ދެ ކޮމިޓީއަށް ހާޒިރުވެވަޑައިގެން، ދެ ކޮމިޓީގައި ދެގޮތަކަށް ވާހަކަފުޅު ދައްކަވާފައިވާ މައްސަލައާ ގުޅޭގޮތުން މަޝްވަރާކުރެއްވިއެވެ. އަދި މި މައްސަލަ ތަޙުޤީޤުކުރުމަށް ތަޙުޤީޤީ އިދާރާއަކަށް ފޮނުވުމަށް ދިއްގަރު ދާއިރާގެ މެންބަރު އިކްރާމް ޙަސަން ހުށަހަޅުއްވައި، ގަމު ދާއިރާގެ މެންބަރު މުޙައްމަދު ވިސާމް ތާޢީދުކުރެއްވި ހުށަހެޅުމަށް ވޯޓަށް އެހުމުން މި ހުށަހެޅުން ފާސްނުވުމުގެ ސަބަބުން، މި މައްސަލަ އިތުރަށް ދިރާސާނުކޮށް ފައިލްކުރުމަށް ކޮމިޓީން ނިންމެވިއެވެ. އިސްދޫ ދާއިރާގެ މެންބަރު ޢަލީ ޙަމީދު ފައިސާގެ މައްސަލައެއްގައި ހިނގި މާރާމާރީއެއްގެ ތުހުމަތުގައި ހެންވޭރު ޕޮލިސް ސްޓޭޝަނަށް ގެންދެވިފައިވާކަމަށާއި، އަދި އެރޭ ހެންވޭރު ޕޮލިސް ސްޓޭޝަނުގެ ބެލުމުގެ ދަށުން ދޫކުރެވިފައިވާކަމަށް ފޮނުއްވާފައިވާ ސިޓީ ކޮމިޓީއާ ޙިއްޞާކުރެއްވިއެވެ. ރައްޔިތުންގެ މަޖިލީހުގެ ޖަލްސާގައި ޕީ.އެން.ސީއަށް ނިސްބަތްވާ ތިން މެންބަރަކަށް، އެމް.ޑީ.ޕީއަށް ނިސްބަތްވާ މެންބަރުންތަކެއް އަނިޔާކޮށްފައިވާ ކަމަށް ބަޔާންކޮށް ޕީ.އެން.ސީގެ ޕާލިމެންޓަރީ ގްރޫޕުން ފޮނުއްވާފައިވާ މައްސަލައިގައި އެކަށީގެންވާ މަޢުލޫމާތު އަދި ހެކި ލިބިފައިނުވާކަމަށާއި، އެހެންކަމުން މައްސަލަ ފައިލްކުރުމަށް ތިނަދޫ ދެކުނު ދާއިރާގެ މެންބަރު ޢަބްދުﷲ ސަނީފް ހުށަހަޅުއްވައި، ގަމު ދާއިރާގެ މެންބަރު މުޙައްމަދު ވިސާމް ތާޢީދުކުރެއްވި ހުށަހެޅުން ކޮމިޓީގެ އަޣްލަބިއްޔަތުން ފާސްވެފައިވެއެވެ.