މިބައްދަލުވުމުގައި އެޖެންޑާ ކުރެވިފައިވަނީ: ނޭޝަނަލް އިންޓެގްރިޓީ ކޮމިޝަންގެ މެންބަރުކަމަށް ކުރިމަތިލައްވާފައިވާ ފަރާތްތަކާ އިންޓަވިއު ކުރެއްވުމަށްފަހު ކޮމިޓީން މަޖިލީހަށް ހުށަހަޅުއްވާފައިވާ ރިޕޯޓު، މަޖިލީހުގެ ތަޅުމުގައި ބަހުސް ކުރެއްވުމަށްފަހު އަނބުރާ މިނިވަންމުއައްސަސާތަކުގެ ކޮމިޓީއަށް ފޮނުއްވާފައިވާތީ އެ ރިޕޯޓާ މެދު ގޮތެއް ނިންމެވުމެވެ. މިގޮތުން ކޮމިޓީގެ މެންބަރުންގެ މެދުގައި މިމައްސަލައަށް މަޝްވަރާ ކުރެއްވުމަށް ، ބައްދަލުވުމުގައި ބައްލަވާފައިވަނީ މި ރިޕޯޓު ހުށަހެޅުނު ދުވަހުގެ މި ރިޕޯޓަށް ބަހުސް ކުރެވުނު 2 ދުވަހުގެ ޔައުމިއްޔާއެވެ. ރިޕޯޓު މަޖްލިހުގެ ތަޅުމަށް ހުށަހެޅުމާއެކު ހިންނަވަރު ދާއިރާގެ މެންބަރު ޖީހާން މަހުމޫދު ހުށަހަޅުއްވައި މެދުހެންވޭރު ދާއިރާގެ މެންބަރު ޢަލީ އާޒިމް ތާއިދު ކުރައްވާފައިވަނީ މި ކޮމިޝަނަށް މެންބަރަކު ހޮއްވެވުމަށް އަލުން ނަންތައް އަނބުރާ މަޖްލީހަށް ފޮނުއްވުމަށް ރައީސުލްޖުމްހޫރިއްޔާއަށް ފޮނުއްވުމަށެވެ. ނަމަވެސް މިހުށަހެޅުމަށް މަޖްލީހުމުގައި ވޯޓަށް އައްސަވާފައިނުވާތީ މިމައްސަލަ ފާހަގަކޮށް އަނބުރާ މި ރިޕޯޓު މަޖްލިހުގެ ރައީސަށް ފޮނުއްވުމަށް މިއަދުގެ އޮތް މި ކޮމިޓީގެ 15 ވަނަ ބައްދަލުވުމުން ނިންމެވިއެވެ.