މިއަދުގެ ބައްދަލުވުމުގައި ގޭން އިންޓަރނޭޝަނަލް އެއަރޕޯޓްގެ ހާލަތު ބެއްލެވުމަށް ކޮމިޓީގެ މެންބަރުން އައްޑޫއަށް ކުރެއްވި ދަތުރާގުޅޭ ގޮތުން މަޝްވަރާކުރެއްވިއެވެ. މިގޮތުން މި ދަތުރުގައި ފާހަގަކުރެވުނު މައްސަލަތަކާ ގުޅޭގޮތުން ސަރުކާރުގެ އިދާރާތަކުން ހޯދަންޖެހޭ މަޢުލޫމާތު ހޯދައި މި މައްސަލަ ދިރާސާކުރެއްވުމަށް ސަބް ކޮމިޓީއެއް ހޮއްވެވިއެވެ. އަދި މި ސަބް ކޮމިޓީގެ މެންބަރުންގެ ގޮތުގައި ތިއްބެވުމަށް އަންނަނިވި މެންބަރުންގެ ނަންތައް ފޭދޫ ދާއިރާގެ މެންބަރު މުޙައްމަދު ނިހާދު ހުށަހަޅުއްވިއެވެ. މި ހުށަހެޅުއްވުމަށް ކިނބިދޫ ދާއިރާގެ މެންބަރު މުޙައްމަދު ނާޝިޒް ތާއިދުކުރެއްވިއެވެ. އަދި އެއްވެސް ބޭފުޅަކު އިއުތިރާޒް ނުކުރައްވާތީ މި ހުށަހެޅުއްވުން ފާސްވިއެވެ. 1. ފޭދޫ ދާއިރާގެ މެންބަރު މުޙައްމަދު ނިހާދު 2. ފުވައްމުލަކު މެދު ދާއިރާގެ މެންބަރު ޙުސައިން މުޙައްމަދުދީދީ 3. ފެލިދޫ ދާއިރާގެ މެންބަރު އިބްރާހީމް ފަޒުލް ރަޝީދު 4. އިސްދޫ ދާއިރާގެ މެންބަރު ޢަލީ ޙަމީދު 5. ތުލުސްދޫ ދާއިރާގެ މެންބަރު އިބްރާހީމް ނަސީމް