މިއަދުގެ ބައްދަލުވުމުގައި ކުރިއަށް ގެންދެވީ ކޮމިޓީއަށް ހުށަހަޅުއްވާފައިވާ އަންނަނިވި މަސައްކަތްތައް ނިންމުމަށް ކޮމިޓީން ކުރިން ކަނޑައަޅާފައިވާ ސުންގަޑި، 30 ޖޫން 2020 ގެ ނިޔަލަށް އިތުރުކުރެއްވުމުގެ މަސައްކަތެވެ. 1. ޤާނޫނު ނަންބަރު 5/2009 (އެއްގަމު ދަތުރުފަތުރުގެ ޤާނޫނު) އަށް އިޞްލާޙު ގެނައުމުގެ ބިލު؛ 2. ކަނޑު ދަތުރުކުރުމުގެ ސަލާމަތާއި ރައްކާތެރިކަމަށް ސަމާލުކަންދިނުން އިތުރުކުރުމަށްޓަކައި ހުށަހަޅާ ޤަރާރު؛ 3. ގޯތިގެދޮރު ކުއްޔަށްދިނުމާބެހޭ ބިލު؛ އަދި 4. ތަޢުލީމުގެ ބިލު. އަދި މިއަދުގެ ބައްދަލުވުމުގައި ހަލުވިކަމާއެކު ފެތުރެމުންދާ ކޮވިޑް 19 އާ ގުޅިގެން، 3 މިނިސްޓްރީއެއްގެ މަސައްކަތްތަކަށް އައިސްފައިވާ ބަދަލުތަކާއި މި ޙާލަތަގައި އެ މިނިސްޓްރީ ތަކުން ކުރެއްވުމަށް ރާއްވަވާފައިވާ މަސައްކަތްތަކާމެދު މަޝްވަރާކުރެއްވުމަށް ކޮމިޓީންވަނީ ނިންމަވާފައެވެ. އެގޮތުން ކޮމިޓީން ބައްދަލުކުރެއްވުމަށް ނިންމެވި މިނިސްޓްރީ ތަކަކީ، މިނިސްޓްރީ އޮފް ކޮމިއުނިކޭޝަން، ސައިންސް އެންޑް ޓެކްނޮލޮޖީ، މިނިސްޓްރީ ނޭޝަނަލް ޕްލޭނިންގ އެންޑް އިންފްރާސްޓްރަކްޗަރ އަދި މިނިސްޓްރީ އޮފް އެޑިއުކޭޝަންއެވެ.