މިއަދުގެ ބައްދަލުވުމުގައި އެޖެންޑާކުރެވިފައިވަނީ ކޮމިޓީގެ މަސައްކަތްތައް ކުރިއަށް ގެންދާނެ ގޮތާމެދު މަޝްވަރާކުރެއްވުމެވެ. މިގޮތުން، ޤާނޫނު ނަންބަރު 2019/14 (ދިވެހިރާއްޖޭގެ މަސްވެރިކަމުގެ ޤާނޫނު) ދަށުން ހަދަންޖެހޭ ގަވާއިދުތައް އެ ޤާނޫނުގެ 86 ވަނަ މާއްދާގެ (ޅ) ގައި ބަޔާންކޮށްފައިވާ މުއްދަތުގައި ހެދިފައިނުވާތީ، އެ ގަވާއިދުތައް އެކުލަވާނުލެވި ލަސްވާ ސަބަބާ ގުޅޭގޮތުން މަޢުލޫމާތު ސާފުކުރެއްވުމަށް ކޮމިޓީގެ މެންބަރުން އިއްތިފާޤުވެލެއްވެވިއެވެ. އަދި މިކަމާ ގުޅޭގޮތުން މިނިސްޓަރ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ އާއި އެ މިނިސްޓްރީގެ ކަމާގުޅޭ ބޭފުޅުންނާ ބައްދަލުކުރުމަށް ނިންމެވިއެވެ. އެއަށްފަހު، މީރާއިން ޢަމަލުކުރައްވަމުންގެންދަވާ އެއްވެސް ގަވާއިދެއްގެ ދަށުން ޖޫރިމަނާއެއް ކުރައްވަމުން ގެންދަވާނަމަ، އެކަމުގެ ތަފްޞީލާ ގުޅޭގޮތުން މަޢުލޫމާތު ސާފުކުރެއްވުމަށް، އެ އޮތޯރިޓީގެ ކަމާގުޅޭ ބޭފުޅުންނާ ބައްދަލުކުރެއްވުމަށް ކޮމިޓީގެ މެންބަރުންގެ މެދުގައި މަޝްވަރާކުރައްވައި ނިންމެވިއެވެ. ޤާނޫނު ނަންބަރު 2008/6 (ޢާންމު ގަވާއިދުތަކުގެ ޤާނޫނު) ގެ ޖަދުވަލު 1 އަދި 2 ގައި ހިމެނިފައިވާ ގަވާއިދުތަކަށް ޢަމަލުކުރާ މުއްދަތު ހަމަވާން ކައިރިވެފައިވުމުން އެ ގަވާއިދުތަކާ ގުޅޭގޮތުން އެޓަރނީ ޖެނެރަލްގެ އޮފީހުން ޑްރާފްޓް ކުރައްވަމުންގެންދަވާ ބިލުތަކާއި، ޑްރާފްޓް ކުރެއްވުމުގެ މަސައްކަތް ނުފެށިވާ ބިލުތަކާއި، އަދި ޑްރާފްޓްކުރައްވައި ނިންމަވާފައިވާ ބިލުތަކުގެ ތަފްޞީލު ހޯދެއްވުމަށް ވެސް ކޮމިޓީން ނިންމެވިއެވެ.