މި ބައްދަލުވުމުގައި ކުރިއަށްގެންދެވީ، "ޤާނޫނު ނަންބަރު 2009/5 (އެއްގަމު ދަތުރުފަތުރުގެ ޤާނޫނު) އަށް ... ވަނަ އިޞްލާޙު ގެނައުމުގެ ބިލު" ކޮމިޓީން ދިރާސާކޮށް ނިންމިގޮތުގެ ރިޕޯޓާއި، ކޯވިޑް-19 އާ ގުޅިގެން ޤައުމީ ތަރައްޤީއާއި ތަރިކައިގެ ކޮމިޓިގެ މަސްއޫލިއްޔަތުގެ ދާއިރާގައި ހިމެނޭ އިދާރާތަކުގެ މަސައްކަތްތައް ކުރިއަށް ގެންދާގޮތް ކޮމިޓީން ދިރާސާކޮށް ނިންމިގޮތުގެ ރިޕޯޓު ފާސްކުރެއްވުމުގެ މަސައްކަތެވެ. އެގޮތުން، ކޮމިޓީގައި ބައިވެރިވެވަޑައިގެންނެވި ހުރިހާ މެންބަރުންގެ އިއްތިފާޤުން ދެ ރިޕޯޓުވެސް ފާސްކުރެވުނެވެ. އެއަށްފަހު، ހޯރަފުށި ދާއިރާގެ މެންބަރު އަޙްމަދު ސަލީމް ހުށަހެޅުއްވީ، ހުޅުމާލެ ދެވަނަ ފިޔަވަހީގައި ތަރައްޤީކުރާ ހިޔާ މަޝްރޫޢުގެ ފްލެޓްތަކުގެ މަސައްކަތްތައް ކުރިޔަށްދާގޮތް ބައްލަވާލެއްވުމަށްޓަކައި އެ މަސައްކަތް ކުރިޔަށްދާ ސައިޓަށް ޒިޔާރަތްކުރެއްވަމަށެވެ. މިހުށަހެޅުމަށް ދިއްގަރު ދާއިރާގެ މެންބަރު އިކްރާމް ޙަސަން ތާއީދުކުރައްވަވައި ކޮމިޓީގައި ބައިވެރިވެވަޑައިގެންނެވި ހުރިހާ މެންބަރުންގެ އިއްތިފާޤުން ފާސްކުރެވުނެވެ. އަދި ހަމައެއާއެކު، ހިޔާ ފްލެޓްގެ މަސައްކަތާ ޙަވާލުވެފައިވާ ކޮމިޓީއާ ބައްދަލުކުރެއްވުމަށްވެސް ހޯރަފުށި ދާއިރާގެ މެންބަރު އަޙްމަދު ސަލީމް ހުށަހެޅުއްވިއެވެ. މި ހުށަހެޅުމަށް ކުރެންދޫ ދާއިރާގެ މެންބަރު ޢަބްދުލްޣަނީ ޢަބްދުލްޙަކީމް ތާއީދުކުރައްވަވައި ހުރިހާ މެންބަރުންގެ އިއްތިފާޤުން ފާސްވިއެވެ. މީގެއިތުރުން، ތަޢުލީމުގެ ބިލު ދިރާސާކުރެއްވުމުގެ މަސައްކަތް ކުރިޔަށްގެންދެވިއެވެ. އެގޮތުން، ބިލުގެ 13 ވަނަ މާއްދާގެ (ހ) އިން ފެށިގެން އެ މާއްދާގެ (ވ) ގެ ނިޔަލަށް ފާސްކުރެއްވިއެވެ.