1. މިއަދުގެ ބައްދަލުވުމުގައި، ހިތަދޫ ރީޖަނަލް ހޮސްޕިޓަލްގެ 2 ޕްރޮޖެކްޓަކަށް އެންމެ ކުޑަ އަގު އެސްޓީއޯގެ ފަރާތުން ހުށަހަޅުއްވާފައިވަނިކޮށް، މެޑިޓެކް މޯލްޑިވްސްއަށް މި ޕްރޮޖެކްޓު ޙަވާލުކުރެވުނު ގޮތް ބައްލަވާދެއްވުން އެދި، ގައި ހުށަހަޅުއްވާފައިވާ މައްސަލައާމެދު މަޝްވަރާކުރެއްވިއެވެ. މި ޕްރޮޖެކްޓްގެ ކަންކަން ކުރިއަށް ގެންގޮސްފައިވަނީ އެންޓި- ކޮރަޕްޝަން ކޮމިޝަންގެ ލަފައާ އެއްގޮތަށް ބިޑް އިވެލުއޭޓް ކުރުމަށް ކަނޑައަޅާފައިވާ އުޞޫލުގެ ތެރެއިންކަމަށް ކޮމިޓީއިން ދިރާސާކުރެއްވި ލިޔެކިޔުންތަކުން ފެންނާތީ، އެގޮތަށް އެފަރާތައް ޖަވާބު އެރުވުމަށް ނިންމެވިއެވެ. 2. ތިލަދުންމަތީ އުތުރުބުރީ ހއ.ވަށަފަރު ތުނޑީގައި 50 އަހަރަށް، 300،000 އަކަފޫޓުގެ ބިމެއް ތަރައްޤީކުރުމަށް ޙަވާލުކޮށްފައިވަނީ ކޮރަޕްޝަނަށް މަގުފަހިވާގޮތަށް، އެފަރާތުގެ ޤާބިލްކަމަށް ބެލުމެއް ނެތިކަމަށް ހުށަހަޅުއްވާފައިވާ މައްސަލައާމެދު މަޝްވަރާކުރެއްވިއެވެ. އެގޮތުން، މި މައްސަލައިގައި ކަންހިނގާފައިވާގޮތް މިނިސްޓްރީ އޮފް ޓޫރިޒަމްއިން ސާފުކޮށް އަދި މި މައްސަލައަކީ އެންޓި- ކޮރަޕްޝަން ކޮމިޝަނުން ތަޙްޤީޤްކުރައްވަމުން ގެންދަވާ މައްސަލައެއްތޯ އާއި މައްސަލަ އެ ކޮމިޝަނުން ތަޙްޤީޤްކުރައްވަމުން ގެންދަވާނަމަ، މައްސަލައިގެ މިހާރުގެ ސްޓޭޓަސް ހޯއްދެވުމަށްފަހު، އެފަރާތަށް ޖަވާބު އެރުވުމަށް ނިންމެވިއެވެ. 3. މޯލްޑިވްސް އިންލެންޑް ރެވެނިއު އޮތޯރިޓީއިން އޮޑިޓްކުރުމުގެ ހުއްދަދޭ ގޮތަށް އޮތް އޮތުން ބާތިލްކުރައްވާ ހަމަ އެކަނި އޮޑިޓަރ ޖެނެރަލް އޮފީހުން ދޫކުރައްވާ އޮޑިޓް ލައިސެންސް ބޭނުންކޮށްގެން އޮޑިޓްކުރެވޭނެ ގޮތަށް ޤާނޫނުތަކާއި ގަވައިދުތައް ބަދަލުކުރެއްވުމަށް އެދިވަޑައިގެން މިނިސްޓްރީ އޮފް ފިނޭންސަށް ފޮނުއްވާ، މާލިއްޔަތު ކޮމިޓީއަށް ކޮޕީކޮށްފައިވާ ސިޓީއާ މެދު މަޝްވަރާކުރެއްވުމަށްފަހު، މިއީ މަޖިލީހުގެ އިދާރާއަށް ކޮޕީކޮށްފައިވާ ސިޓީއެއްކަމުން، ސިޓީ ފައިލްކުރުމަށް ނިންމެވިއެވެ. 4. މިނިސްޓްރީ އޮފް ފިނޭންސް އިން ފޮނުއްވާފައިވާ ލޯނު އަދި ގެރެންޓީއާގުޅޭ މަޢުލޫމާތުތައް މެންބަރުންނާއި ޙިއްޞާކުރެއްވުމަށްފަހު، މި ލިޔެކިޔުންތަކަކީ ކޮމިޓީގެ މަޢުލޫމާތަށްޓަކައި ފޮނުއްވާފައިވާ ލިޔެކިޔުންކަމަށްވާތީވެ، ފައިލްކުރުމަށް ނިންމެވިއެވެ.