ނޭޝަނަލް އިންޓެގްރިޓީ ކޮމިޝަނާ ގުޅޭގޮތުން ސަލާމަތީ ޚިދުމަތްތަކާބެހޭ ކޮމިޓީން ފޮނުއްވާފައިވާ މައްސަލަ ދިރާސާކުރެއްވުމެވެ. ހުށަހެޅިފައިވާ މައްސަލައާ ގުޅޭގޮތުން މަޝްވަރާކުރުމަށް ފުރުސަތު ހުޅުވާލުމުން އިނގުރައިދޫ ދާއިރާގެ މެންބަރު ޙަސަން އަޙްމަދު ހުށަހެޅުއްވީ މި މައްސަލަ ދިރާސާކުރެއްވުމަށް ސަބް ކޮމިޓީއެއް އެކުލަވާލެއްވުމަށެވެ. ސަބް ކޮމިޓީގެ ހިމެނިވަޑައިގަންނަވާނެ މެންބަރުންނަކީ އިސްދޫ ދާއިރާގެ މެންބަރު އަލީ ޙަމީދު، ތިނަދޫ ދެކުނު ދާއިރާގެ މެންބަރު ޢަބްދުﷲ ސަނީފް އަދި ވިލިމާލެ ދާއިރާގެ މެންބަރު އަޙްމަދު އުޝާމް އަދި އިނގުރައިދޫ ދާއިރާގެ މެންބަރު ޙަސަން އަޙްމަދު ކަމަށް ގަމު ދާއިރާގެ މެންބަރު މުޙައްމަދު ވިސާމް ހުށަހަޅުއްވާ ގަލޮޅު ދެކުނު ދާއިރާގެ މެންބަރު މީކާއީލް އަޙްމަދު ނަސީމް ތައީދުކުރެއްވިއެވެ. މި ހުށަހެޅުއްވުމަށް ވޯޓަށް އެއްސެވުމުން ކޮމިޓީގައި އެވަގުތު ކޮމިޓީއަށް ހާޒިރުވެ ވޯޓުގައި ބައިވެރިވެވަޑައިގެންނެވި މެންބަރުންގެ އިއްތިފާގުން ފާސްވިއެވެ.