މި ބައްދަލުވުމުގައި އެމް.އެމް.އޭގެ ގަވަރުނަރާ ގުޅޭގޮތުން، ޢަބްދުﷲ އަޝްރަފް ފޮނުއްވާފައިވާ ސިޓީއާ މެދު ގޮތެއް ނިންމެވުމުގެ މަސައްކަތް ކުރިއަށް ގެންދެވިއެވެ. މި މައްސަލައަކީ 18 ވަނަ މަޖިލީހުގެ މާލިއްޔަތު ކޮމިޓީގައިވެސް ދިރާސާކުރެވުނު މައްސަލައަކަށްވެފައި، މި މައްސަލައިގައި ވަކިވަކިން ޢަބްދުﷲ އަޝްރަފް އަދި އެމް.އެމް.އޭގެ ގަވަރުނަރު ޙާޒިރުކޮށް ކޮމިޓީގައި ސުވާލުކުރެވިފައިވާތީ، އެ ބައްދަލުވުންތަކުގެ ޔައުމިއްޔާ މެންބަރުންނާއި ޙިއްސާކުރެއްވުމަށްފަހު، މައްސަލައިގައި ގޮތެއް ނިންމެވުމަށް ނިންމެވިއެވެ. އެއަށްފަހު، މޯލްޑިވްސް މީޑިޔާ ކައުންސިލުން ކުރަންޖެހޭ މަސައްކަތްތަކާއި، ކައުންސިލްގެ ބަޖެޓާ ގުޅޭގޮތުން މަޝްވަރާކުރެއްވުމަށް ބައްދަލުވުމަކަށް އެދި ފޮނުއްވާފައިވާ ސިޓީއާ މެދު ގޮތެއް ނިންމެވުމުގެ މަސައްކަތް ކުރިއަށް ގެންދެވިއެވެ. އެގޮތުން މެންބަރުންގެ މެދުގައި މަޝްވަރާކުރެއްވުމަށްފަހު ނިންމެވީ، މިނިސްޓްރީ އޮފް ފިނޭންސްއާ ގުޅިގެން ބަޖެޓްގެ މައްސަލައަށް ޙައްލެއް ހޯއްދެވުމަށް، އެ ކައުންސިލަށް ދެންނެވުމަށެވެ. މީގެއިތުރުން، މޯލްޑިވްސް ޓްރޭޑް ޔޫނިއަންގެ ކައުންސިލުން ބައްދަލުވުމަކަށް އެދި ފޮނުއްވާފައިވާ ސިޓީއާމެދު ގޮތެއް ނިންމެވުމުގެ މަސައްކަތް ކުރިއަށް ގެންދެވިއެވެ. އެގޮތުން، އެ ޔޫނިއަން އިން މަޢުލޫމާތު ސާފުކުރެއްވުމަށްފަހު، ބައްދަލުވުން ކުރިއަށް ގެންދެވުމަށް ނިންމެވިއެވެ. އޮޑިޓަރ ޖެނެރަލްގެ އޮފީހުން ނެރުއްވާފައިވާ ވެޓްލޭންޑް ކޮންޒަރވޭޝަން އެންޑް ކޮރަލް ރީފް މޮނިޓަރިން ޕްރޮޖެކްޓްގެ 2014 ވަނަ އަހަރުގެ އޮޑިޓް ރިޕޯޓާ ގުޅޭގޮތުން މަޝްވަރާކުރެއްވުން ކުރިއަށް ގެންދެވިއެވެ. އަދި ކޮމިޓީގެ ރިޕޯޓް ތަޅުމަށް ފޮނުއްވުމަށް ނިންމެވިއެވެ.