މިއަދުގެ ބައްދަލުވުމުގައި އެންމެ ފުރަތަމަ ކުރިއަށް ގޮސްފައިވަނީ، އަމިއްލަ ފަރާތްތަކުން ކޮމިޓީއަށް ފޮނުވާ ސިޓީއާއި މައްސަލަތަކާމެދު އަމަލުކުރާނެ ގޮތުގެ އުސޫލު މެންބަރުންނާ ހިއްސާކުރުމެވެ. ދެވަނަ ކަމަކަށް މިއަދުގެ ބައްދަލުވުމުގައި ކުރިއަށްގޮސްފައިވަނީ 'ދިވެހިރާއްޖޭގެ ހަކަތައިގެ ބިލް' ދިރާސާކުރުމެވެ. މިގޮތުން މި ބިލަށް ޚިޔާލަށް ހުށަހެޅުމަށް ޢާންމުކޮށް ހުޅުވާލައި، ކަމާގުޅޭ އިދާރާތަކުގެ ޚިޔާލު ހޯދުމަށް އެ އިދާރާތަކަށް ސިޓީ ފޮނުވުމަށް ކޮމިޓީއިން ވަނީ ނިންމަވާފައެވެ. އަދި ބިލުގެ މަސައްކަތް ކުރުމަށް އެކުލަވާލާފައިވާ ސަބް ކޮމިޓީއަށް ގައްދޫ ދާއިރާގެ މެންބަރު އަޙްމަދު ޒާހިރު ޢައްޔަނުކުރައްވައި، މި ބިލިގެ މަސައްކަތް އެ ކޮމިޓީއިން ކުރިއަށްގެންދިއުމަށް ކޮމިޓީއިން ވަނީ ނިންމަވާފައެވެ.