މިއަދުގެ ބައްދަލުވުމުގައި ލޯކަލް ގަވަރމަންޓް އޮތޯރިޓީން ކައުންސިލަރުން ސަސްޕެންޑްކުރުމުގައާއި، ކައުންސިލަރުންނާމެދު ފިޔަވަޅު އެޅުމުގައި ޢަމަލުކުރަމުންދާ އުޞޫލުތަކާއި މިންގަނޑުތައް ލާމަރުކަޒީ ކޮމިޓީގެ ސަބް-ކޮމިޓީން ދިރާސާކުރައްވައި ނިންމެވިގޮތުގެ ރިޕޯޓާ ގުޅޭގޮތުން މެންބަރުން މަޝްވަރާކުރެއްވިއެވެ. މިގޮތުން އެލް.ޖީ.އޭ އިން ޤާނޫނާ ޚިލާފަށް ހަދާފަ ހުރި ޢުޞޫލުތަކާއި އަޅާފަހުރި ފިޔަވަޅުތަކަށް ޤާނޫނީ ލަފާދެއްވީ ކޮން ބޭފުޅެއްތޯއާއި ލަފާދެއްވި ތާރީޚް އެނގޭނެ ލިޔުންތައް ހޯދުމަށް އެ އޮތޯރިޓީއަށް ސިޓީ ފޮނުއްވުމަށާއި އަދި އެއްވެސް ޤާނޫނީ ލަފައެއް އެލް.ޖީ.އޭ އަށް ދެއްވާފައިވޭތޯ ބެއްލެވުމަށް އެޓަރނީ ޖެނެރަލްގެ އޮފީހަށް ވެސް ސިޓީ ފޮނުއްވުމަށް ނިންމެވިއެވެ. އަދި އެލް.ޖީ.އޭ އިން ކައުންސިލަރުންގެ މައްޗަށް ފިޔަވަޅު އަޅާފައިވާއިރު ފިޔަވަޅު އަޅާފައިވަނީ ކޮން ޕާޓީއެއްގެ ކައުންސިލަރުންނަށް ކަން އެނގޭނެ ލިޔުމެއް ފޮނުއްވައިދެއްވުމަށް އެދި ސިޓީ ފޮނުއްވުމަށްވެސް ނިންމެވިއެވެ. އަދި މާލޭ ސިޓީ ކައުންސިލަށް ދީފައިވާ އޮފީހުން އެބޭފުޅުން ބޭރުކުރުމުގައި އެލް.ޖީ.އޭ އިން ސަރުކާރުގެ އިދާރާތަކާއި އެކު ކޮށްފައިވާ އެންމެހައި މުޢާމަލާތްތަކުގެ ތަފްޞީލް ހޯދުމަށް ސިޓީއެއް ފޮނުއްވުމަށް ވެސް ނިންމެވިއެވެ. އެއަށްފަހު ސަބް ކޮމިޓީ ރިޕޯޓް ކޮމިޓީއަށް ބަލައިގަތުމަށާއި އަދި މި ރިޕޯޓްގައި ހިމެނޭ ބައިތަކާއެކު މައި ކޮމިޓީން ރިޕޯޓް ހަދާ އެލް.ޖީ.އޭ ބޯޑުގެ މެންބަރުންނަށް މަޤާމުގެ ޒިންމާ އަދާނުކުރެވޭ ކަމަށާއި އަދި ޤާނޫނާ ޚިލާފަށް ނިންމުންތައް ނިންމަވާފައިވާކަން ފާހަގަކޮށް އެބޭފުޅުން މަޤާމުން ވަކިކުރުމަށް ލަފާދީ މަޖިލީހުގެ ތަޅުމަށް އެ ރިޕޯޓް ފޮނުއްވުމަށް ނިންމެވިއެވެ.