މިއަދުގެ ބައްދަލުވުމުގައި ލޯކަލް ގަވަރމަންޓް އޮތޯރިޓީން ކައުންސިލަރުން ސަސްޕެންޑްކުރުމުގައާއި، ކައުންސިލަރުންނާމެދު ފިޔަވަޅު އެޅުމުގައި ޢަމަލުކުރަމުންދާ އުޞޫލުތަކާއި މިންގަނޑުތައް ލާމަރުކަޒީ ކޮމިޓީން ދިރާސާކުރައްވައި ނިންމެވިގޮތުގެ ރިޕޯޓާ ގުޅޭގޮތުން މެންބަރުން މަޝްވަރާކުރެއްވިއެވެ. މިގޮތުން މެންބަރުން ހުށަހަޅުއްވާފައިވާ ގޮތަށް އެ ރިޕޯޓް އިސްލާޙުކުރެއްވުމަށް ފަހު މަޖިލީހުގެ ތަޅުމަށް ފޮނުއްވުމަށް ނިންމެވިއެވެ. އެއަށްފަހު ރެޒިޑެންޝަލް ލާރނިންގ ސެންޓަރތައް ލާމަޒުކަޒީ އުޞޫލުން ހިނގަމުން ނުދާތީ އެ މައްސަލަ ބައްލަވައިދެއްވުމަށް އެދި ޢަލީ ސަޢީދު ހުށަހަޅުއްވާފައިވާ ސިޓީ އަކީ އެޑިއުކޭޝަން މިނިސްޓްރީގެ ތެރެއިން ޙައްލުކުރެވޭނެ މައްސަލައެއްކަމަށް ވުމުން، އެ މައްސަލަ ޤައުމީ ތަރައްޤީގެ ކޮމިޓީއަށް ފޮނުއްވުމަށް ނިންމެވިއެވެ. ދެން ކޮމިޓީގައި މަޝްވަރާކުރެއްވީ ލާމަޒުކަޒީ ޤާނޫނު އަށް އިސްލާޙުގެނައުމުގެ ބިލު އަށް ދިރާގުގެ ކޮމެންޓްތައް ހުރުމާއެކު ކޮމިޓީއާ ބައްދަލުކުރެއްވުމަށް އެދި އެ ކުންފުނިން ފޮނުއްވާފައިވާ ސިޓީއެވެ. މިގޮތުން އަދި މި ބިލު ކޮމިޓީއަށް އައިސްފައިނުވި ނަމަވެސް އޭގެ ކުރިން ދިރާގުގެ ބޭފުޅުންނާ ބައްދަލުކުރައްވާ އެބޭފުޅުންގެ ކޮމެންޓްތައް ސާފުކުރެއްވުމަށްފަހު ސަރުކާރާ އެކަން ޙިއްޞާކުރެއްވުމަށް ކޮމިޓީން ނިންމެވިއެވެ. އެއަށްފަހު ނައިފަރު ކައުންސިލުން ހުށަހަޅުއްވާފައިވާ މައްސަލަ ދިރާސާކުރެއްވުމަށް ކުޑަ ކޮމިޓީއެއް ހޮއްވެވިއެވެ.
ބައްދަލުވުމުގެ އެޖެންޑާ ބައްދަލުވުމުގެ ޔައުމިއްޔާ ބައްދަލުވުމުގެ ޚާޒިރީ© 2024 ރައްޔިތުންގެ މަޖިލިސްގެ އިދާރާA