ޚުލާސާ

މިބައްދަލުވުމުގައި ފުރަތަމަ އޮތީ ކޮމިޓީގެ މުޤައްރިރު އަދި ނައިބު މުޤައްރިރު ހޮއްވެވުމެވެ. ކޮމިޓީގެ މުޤައްރިރު އަދި ނައިބު މުޤައްރިރު ހޮއްވެވުމުގެ މަސައްކަތް ކުރިޔަށްގެންގޮސްދެއްވީ، އެސިސްޓަންޓް ޑިރެކްޓަރ ޖެނެރަލް އެކައުންޓްސް، ޝަބާނާ ރަޝީދުއެވެ. ކޮމިޓީގެ މުޤައްރިރެއްގެ ގޮތުގައި ހުންނަވަން ފެނިވަޑައިގަންނަވާ ބޭފުޅެއްގެ ނަންފުޅެއް ނުވަތަ ނަންފުޅުތަކެއް ހުށަހެޅުއްވުމަށް ފުރުޞަތު ހުޅުވާލުމުން، 2 ހުށަހެޅުން ހުށަހެޅިގެން ދިޔައެވެ. އެއީ، ފުރަތަމަ ހުށަހެޅުން، ހަނިމާދޫ ދާއިރާގެ މެންބަރު ޢަބްދުލްޣަފޫރު މޫސާ ހުށަހަޅާ ކުޅުދުއްފުށި އުތުރު ދާއިރާގެ މެންބަރު ޔާސިރު ޢަބްދުއްލަޠީފް ތާއީދުކުރެއްވި ކިނބިދޫ ދާއިރާގެ މެންބަރު މުޙައްމަދު ނާޝިޒް ގެ ނަންފުޅެވެ. އަދި ދެވަނަ ހުށަހެޅުން، ހުޅުދޫ ދާއިރާގެ މެންބަރު އިލްޔާސް ލަބީބު ހުށަހަޅާ މާފަންނު މެދު ދާއިރާގެ މެންބަރު އިބްރާހީމް ރަޝީދު ތާއީދުކުރެއްވި ވިލުފުށި ދާއިރާގެ މެންބަރު ޙަސަން ޢަފީފު ގެ ނަންފުޅެވެ. ފުރަތަމަ ހުށަހެޅުއްވި، ހުށަހެޅުމާއި އެއްގޮތަށް ކިނބިދޫ ދާއިރާގެ މެންބަރު މުޙައްމަދު ނާޝިޒްގެ ނަންފުޅަށް ވޯޓަށް އައްސަވައި ކޮމިޓީއަށް ޙާޒިރުވެވަޑައިގެން ތިއްބެވި މެންބަރުންގެ އަޤްލަބިއްޔަތުން (22/18) ކިނބިދޫ ދާއިރާގެ މެންބަރު މުޙައްމަދު ނާޝިޒް ކޮމިޓީގެ މުޤައްރިރެއްގެ ގޮތުގައި ހޮވިވަޑައިގަތެވެ. މި ހުށަހެޅުން ފާސްވުމާ ގުޅިގެން ދެވަނައަށް ހުށަހެޅިފައިވާ ވިލުފުށި ދާއިރާގެ މެންބަރު ޙަސަން ޢަފީފު ގެ ނަންފުޅަށް ވޯޓަށް ނާއްސަވައެވެ. އަދި ނައިބު މުޤައްރިރަކަށް ނަން ހުށަހެޅުމުގެ ފުރުސަތު ހުޅުވާލުމުން ހުށަހެޅިގެން ގޮސްފައިވަނީ އެއް ހުށަހެޅުމެވެ. އެއީ، ހަނިމާދޫ ދާއިރާގެ މެންބަރު ޢަބްދުލްޣަފޫރު މޫސާ ހުށަހަޅުއްވައި ކިނބިދޫ ދާއިރާގެ މެންބަރު މުޙައްމަދު ނާޝިޒް ތާއީދުކުރެއްވި އަލިފުށި ދާއިރާގެ މެންބަރު މުޙައްމަދު ރަޝީދު ޙުސައިންގެ ނަންފުޅެވެ. އިތުރު ބޭފުޅުންގެ ނަންފުޅު ހުށަހެޅި ތާއީދު ލިބިފައިވީ ނަމަވެސް، އެ މެންބަރުން ތަނާޒިލުވެވަޑައިގެންނެވިއެވެ. އަދި، ހުށަހެޅި ތާއީދުލިބިފައިވާ ނަންފުޅަށް ވޯޓަށް އައްސަވައި ކޮމިޓީގެ އަޣުލަބިއްޔަތުން (22/19) އަލިފުށި ދާއިރާގެ މެންބަރު މުޙައްމަދު ރަޝީދު ޙުސައިން ކޮމިޓީގެ މުޤައްރިރުގެ ނައިބު ގޮތުގައި ހޮވުނެވެ. އެއަށްފަހު، ކޮމިޓީގެ ހިންގާ ގަވާއިދު ފާސްކުރުމުގެ މަސައްކަތް ކުރިއަށް ގެންދެވިއެވެ. އެގޮތުން، ސެކްރެޓޭރިއަޓުން ތައްޔާރުކޮށްފައިވާ ކޮމިޓީ ގަވާއިދު އޮތްގޮތަށް ފާސްކުރެވިއެވެ. މީގެއިތުރުން، މަޖިލީހުގެ ގަވާއިދުގެ 212 ވަނަ މާއްދާގައިވާ ގޮތުގެމަތިން، ބަޖެޓާއި މެދު މޯލްޑިވްސް މަނިޓަރީ އޮތޯރިޓީ އަދި އޮޑިޓަރ ޖެނެރަލް އޮފީހުން ދެކޭގޮތް ލިޔުމުން ސާފުކުރުމަށް ނިންމަވައި، މި ބައްދަލުވުން ނިންމަވައިލެއްވިއެވެ.

ބައްދަލުވުމުގައި ކުރެވުނު މަސައްކަތްތައް

25 ނޮވެމްބަރު 2019 - މިނިސްޓްރީ އޮފް ފިނޭންސްއިން ރައްޔިތުންގެ މަޖިލީހަށް ހުށަހެޅުއްވި 2020 ވަނަ އަހަރަށް ލަފާކުރާ ދައުލަތުގެ ބަޖެޓު، ބަޖެޓު ދިރާސާކުރާ ކޮމިޓީން ދިރާސާކޮށް ނިންމިގޮތުގެ ރިޕޯޓު