1. މިއަދުގެ ބައްދަލުވުމުގައި، ތިލަދުންމަތީ އުތުރުބުރީ ހއ.ވަށަފަރު ތުނޑީގައި 50 އަހަރަށް، 300،000 އަކަފޫޓުގެ ބިމެއް ތަރައްޤީކުރުމަށް ޙަވާލުކޮށްފައިވަނީ ކޮރަޕްޝަނަށް މަގުފަހިވާގޮތަށް، އެފަރާތުގެ ޤާބިލްކަމަށް ބެލުމެއް ނެތިކަމަށް ފާހަގަކުރައްވާ ހުސެއިން ހަނީފް، 12 ނޮވެމްބަރު 2019 ގައި ފޮނުއްވާފައިވާ ސިޓީއާމެދު މަޝްވަރާކުރެއްވިއެވެ. އެގޮތުން، މި މައްސަލައިގައި ކޮމިޓީއިން އެންޓި-ކޮރަޕްޝަން ކޮމިޝަނުން ހޯދާފައިވާ މަޢުލޫމާތު އެފަރާތާ ޙިއްޞާކުރެއްވުމަށް ނިންމެވިއެވެ. 2. އދ. ފުށިދިއްގާ (ރަތްދިއްގާ) ގެ މުޢާމަލާތާ ގުޅޭގޮތުން އެޗް.އެމް.އެޗް.އައި ކޮމްޕެނީ ޕްރައިވެޓް ލިމިޓެޑް އިން 13 އޮގަސްޓް 2020 ގައި ފޮނުއްވާފައިވާ ސިޓީގައި، މައްސަލަ ހުށަހެޅުއްވި ފަރާތުގެ ސޮއި ހިމެނިފައިނުވާތީ، މައްސަލަ އަނބުރާ ޢާންމު ކޮމިޓީއަށް ފޮނުއްވުމަށް ނިންމެވިއެވެ. 3. ބޭންކް އޮފް ސިލޯނުގެ އިސް މުވައްޒަފުން ހިންގާފައިވާ (ގާތްގަނޑަކަށް ޖުމްލަ) 4.1 މިލިއަން ރުފިޔާގެ ވައްކަމާއި މަކަރާއި ހީލަތުގެ ޢަމަލުގެ ޝަކުވާއާއި ރާއްޖޭގައި ރަޖިސްޓްރީކޮށްގެން ހިންގާ ރާއްޖެއިން ބޭރުގެ ބޭންކްތަކުން ޢަމަލުކުރަމުން އަންނަ މަކަރުވެރި ދޯދިޔާ އުޞޫލާ ގުޅިގެން މުއައްސަސީ ދަރަޖައެއްގައި ފަރުވާ ހޯދައިދިނުމަށް އެދި ހުށަހެޅިފައިވާ މައްސަލައާމެދު މަޝްވަރާކުރެއްވިއެވެ. އެގޮތުން، މި މައްސަލައިގައި ބޭންކް އޮފް ސިލޯނުއާމެދު މޯލްޑިވްސް މަނިޓަރީ އޮތޯރިޓީއިން އެއްވެސް ފިޔަވަޅެއް އަޅުއްވާފައިވޭތޯއާއި، ބޭންކްތައް ރެގިއުލޭޓްކުރައްވާ މުއައްސަސާއެއްގެ ހައިސިއްޔަތުން، މިފަދަ ކަންކަން ނުވާނެގޮތަކަށް އެ އޮތޯރިޓީއިން ކުރައްވަމުން ގެންދަވާ މަސައްކަތްތަކުގެ ތަފްޞީލު މޯލްޑިވްސް މަނިޓަރީ އޮތޯރިޓީއިން ހޯދުމަށް ނިންމެވިއެވެ. އަދި އެ އޮތޯރިޓީއާ ގުޅިގެން މައްސަލަ ކުރިއަށް ގެންދަވާނެކަމަށް، މައްސަލަ ހުށަހެޅުއްވި ފަރާތަށް ދެންނެވުމަށްވެސް ނިންމެވިއެވެ. 4. ދާރުއްޒިކުރާގެ މަޝްރޫޢާ ގުޅޭގޮތުން މިނިސްޓްރީ އޮފް އިސްލާމިކް އެފެއާޒްގެ ކުރީގެ ޕަރމަނަންޓް ސެކްރެޓަރީ ފޮނުއްވާފައިވާ ސިޓީއާ ގުޅިގެން މިނިސްޓްރީ އޮފް އިސްލާމިކް އެފެއާޒްއިން މަޢުލޫމާތު ހޯދުމަށް ސިޓީ ފޮނުވުމަށް ނިންމެވިއެވެ. 5. އައްޑޫ ސިޓީގެ ނޭޗަރ ޕާކުގެ މުވައްޒަފުން ކޮރަޕްޝަނަށް މަގުފަހިވާގޮތަށް ޢަމަލުކުރަމުންދާކަމަށް ބުނެ ހުށަހެޅިފައިވާ މައްސަލައާމެދު މަޝްވަރާކުރެއްވުމަށްފަހު ނިންމަވާފައިވަނީ، މި މައްސަލައިގައި ކޮރަޕްޝަންގެ ޢަމަލެއް ހިނގާފައިވާކަމަށް އެ ފަރާތަށް ޤަބޫލުކުރެވޭނަމަ، އެ މައްސަލައެއް އެންޓި-ކޮރަޕްޝަން ކޮމިޝަނަށް ހުށަހަޅުއްވައިގެން ކުރިއަށް ގެންދެވުމަށް އެފަރާތަށް ދެންނެވުމަށެވެ.