މިބައްދަލުވުމުގައި ފުރަތަމަ އޮތީ ކޮމިޓީގެ މުޤައްރިރު އަދި ނައިބު މުޤައްރިރު ހޮއްވެވުމެވެ. ކޮމިޓީގެ މުޤައްރިރު އަދި ނައިބު މުޤައްރިރު ހޮއްވެވުމުގެ މަސައްކަތް ކުރިޔަށްގެންގޮސްދެއްވީ، ޑިރެކްޓަރ ލީގަލް އެފެއަރޒް، އަޙްމަދު ނާޒިމް މުޙައްމަދުއެވެ. ކޮމިޓީގެ މުޤައްރިރެއްގެ ގޮތުގައި ހުންނަވަން ފެނިވަޑައިގަންނަވާ ބޭފުޅެއްގެ ނަންފުޅެއް ނުވަތަ ނަންފުޅުތަކެއް ހުށަހެޅުއްވުމަށް ފުރުޞަތު ހުޅުވާލުމުން، 1 ހުށަހެޅުން ހުށަހެޅިގެން ދިޔައެވެ. އެއީ، ހިތަދޫ އުތުރު ދާއިރާގެ މެންބަރު މުޙައްމަދު އަސްލަމް ހުށަހަޅާ ތިނަދޫ އުތުރު ދާއިރާގެ މެންބަރު ޢަބްދުލްމުޣުނީ ތާއީދުކުރެއްވި ކިނބިދޫ ދާއިރާގެ މެންބަރު މުޙައްމަދު ނާޝިޒް ގެ ނަންފުޅެވެ. ހުށަހެޅުމާއި އެއްގޮތަށް ކިނބިދޫ ދާއިރާގެ މެންބަރު މުޙައްމަދު ނާޝިޒްގެ ނަންފުޅަށް ވޯޓަށް އައްސަވައި ކޮމިޓީއަށް ޙާޒިރުވެވަޑައިގެން ތިއްބެވި މެންބަރުންގެ އަޤްލަބިއްޔަތުން (21/20) ކިނބިދޫ ދާއިރާގެ މެންބަރު މުޙައްމަދު ނާޝިޒް ކޮމިޓީގެ މުޤައްރިރެއްގެ ގޮތުގައި ހޮވިވަޑައިގަތެވެ. އަދި ނައިބު މުޤައްރިރަކަށް ނަން ހުށަހެޅުމުގެ ފުރުސަތު ހުޅުވާލުމުން ހުށަހެޅިގެން ގޮސްފައިވަނީ އެއް ހުށަހެޅުމެވެ. އެއީ، ހިތަދޫ ދެކުނު ދާއިރާގެ މެންބަރު އިބްރާހީމް ނާޒިލް ހުށަހަޅުއްވައި މާފަންނު މެދު ދާއިރާގެ މެންބަރު އިބްރާހީމް ރަޝީދު ތާއީދުކުރެއްވި އަލިފުށި ދާއިރާގެ މެންބަރު މުޙައްމަދު ރަޝީދު ޙުސައިންގެ ނަންފުޅެވެ.އަދި، ހުށަހެޅި ތާއީދުލިބިފައިވާ ނަންފުޅަށް ވޯޓަށް އައްސަވައި ކޮމިޓީގެ އަޣުލަބިއްޔަތުން (21/20) އަލިފުށި ދާއިރާގެ މެންބަރު މުޙައްމަދު ރަޝީދު ޙުސައިން ކޮމިޓީގެ މުޤައްރިރުގެ ނައިބު ގޮތުގައި ހޮވުނެވެ. އެއަށްފަހު، ކޮމިޓީގެ ހިންގާ ގަވާއިދު ފާސްކުރުމުގެ މަސައްކަތް ކުރިއަށް ގެންދެވިއެވެ. އެގޮތުން، 2020 ވަނަ އަހަރުގެ ބަޖެޓް ދިރާސާކުރައްވާ ކޮމިޓީއިން ފާސްކޮށްފައިވާ ކޮމިޓީގެ ހިންގާ ގަވާއިދު ފާސްކުރުމަށް ކުޑަހުވަދޫ ދާއިރާގެ މެންބަރު އަޙްމަދު ޢާމިރު ހުށަހަޅުއްވާ ދާންދޫ ދާއިރާގެ މެންބަރު ޔަޢުޤޫބު ޢަބްދުﷲ ތާޢީދުކުރެއްވި ހުށަހެޅުން ވަނީ ކޮމިޓީގެ އަޢުލަބިއްޔަތުން ފާސްވެފައެވެ. މީގެއިތުރުން، ބަޖެޓާއި ގުޅޭ މަޝްވަރާކުރުމަށް މިނިސްޓަރ އޮފް ފިނޭންސް، މިނިސްޓަރ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ، މިނިސްޓަރ އޮފް އިކޮނޮމިކް ޑިވެލޮޕްމަންޓް، އަދި މިނިސްޓްރީ އޮފް ފިނޭންސް ގެ ބަޖެޓް ބޭފުޅުންނާއި މާދަމާ ( 10.11.2020 ވާ އަންގާރަ ދުވަހު) ބައްދަލުކުރަމަށްފަހު އޮޑިޓަރ ޖެނެރަލް އޮފީސް އަދި މޯލްޑިވްސް މަނިޓަރީ އޮތޯރިތީއާ ބައްދަލުކުރުމަށް އަދި އެއްފަހަރު މިނިސްޓަރ އޮފް ފިނޭންސް އަދި އެ އޮފީހުގެ ބަޖެޓް ޓީމް ގެ ބޭފުޅުންނާ ބައްދަލުކުރުމަށް ނިންމަވައި، ކޮމިޓީގެ ބައްދަލުވުން ނިންމަވައިލެއްވިއެވެ.