މިއަދުގެ ބައްދަލުވުމުގައި ޤާނޫނު ނަންބަރު 2019/14 (ދިވެހިރާއްޖޭގެ މަސްވެރިކަމުގެ ޤާނޫނު) ދަށުން ހަދަންޖެހޭ ގަވާއިދުތައް އެ ޤާނޫނުގެ 86 ވަނަ މާއްދާގެ (ޅ) ގައި ބަޔާންކޮށްފައިވާ މުއްދަތުގައި ހެދިފައިނުވާތީ، އެ މައްސަލަ ނިންމިގޮތުގެ ރިޕޯޓް ކޮމިޓީއަށް އަނބުރާ ފޮނުވިފައިވާތީ، މި މައްސަލައާ ގުޅޭގޮތުން ކޮމިޓީއަށް ލިބިފައިވާ ލިޔުންތަކަށް ރިޢާޔަތްކުރެއްވުމަށްފަހު، ކޮމިޓީއަށް ހާޒިރުވެވަޑައިގެންނެވި މެންބަރުންގެ އިއްޠިފާޤުން ނިންމަވާފައިވަނީ ޤާނޫނު ނަންބަރު 2019/14 (ދިވެހިރާއްޖޭގެ މަސްވެރިކަމުގެ ޤާނޫނު) ގެ ދަށުން ހެދުމަށް ލާޒިމުކޮށްފައިވާ ގިނަ ގަވާއިދުތަކެއް އެ ޤާނޫނުގައި ބަޔާންކުރާ މުއްދަތުގައި ނުނިމިވާތީ، އެކަމުގައި މިނިސްޓްރީ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރއިން އިހުމާލުވެފައިވާކަމަށާއި އަދި އެ މިނިސްޓްރީއަށް ދެންނެވުނު ޤާނޫނުން މަތިކޮށްފައިވާ މަސްއޫލިއްޔަތު އަދާކުރައްވާފައިނުވާކަމަށެވެ. އެހެންކަމުން، އެ މައްސަލަ ބައްލަވައިދެއްވުން އެދި ރައްޔިތުންގެ މަޖިލީހުގެ ސަރުކާރު މަސްއޫލިއްޔަތު އަދާކުރާ މިންވަރު ބަލާ ކޮމިޓީއަށް ފޮނުއްވުމަށް ނިންމެވިއެވެ. އެއަށްފަހު، ޤާނޫނު ނަންބަރު 4/2017 (ޢިމާރާތްކުރުމުގެ ޤާނޫނު) ދަށުން ހަދާފައިވާ "ޕްލޭނިންގ ގަވާއިދެއް ނެތް ރަށްރަށް ނުވަތަ ފަޅުފަޅުގައި ޢިމާރާތް ކުރަންވީގޮތުގެ ގަވާއިދު" ވަކި ވަކި މާއްދާތައް ބަލައި ކޮމިޓީން ދިރާސާކުރެއްވުމަށް ނިންމެވިއެވެ. ދެން މަޝްވަރާކުރެއްވީ ސަރުކާރުގެ އިދާރާތަކުން ޢަމަލުކުރަމުންގެންދާ ގަވާއިދުތަކުގެ ދަށުން ފީ އަދި ޖޫރިމަނާ ނަގަމުންދާ ގަވާއިދުތައް ބަލައި، އެ ފީތައް ނަގަމުންދަނީ ޤާނޫނާ އެއްގޮތަށްތޯ ބައްލަވައިދެއްވުން އެދި ކޮމިޓީއަށް ހުށަހެޅިފައިވާ މައްސަލަ ކޮމިޓީއިން ދިރާސާކޮށް ނިންމިގޮތުގެ ޑްރާފްޓް ރިޕޯޓާ ގުޅޭގޮތުން މަޝްވަރާކުރެއްވިއެވެ. އަދި ރިޕޯޓަށް ގެނެވުނު އިސްލާޙާއެކު ކޮމިޓީގެ ހާޒިރުވެވަޑައިގެން ތިއްބެވި މެންބަރުންގެ އިއްޠިފާޤުން އެ ރިޕޯޓް ފާސްކުރެއްވިއެވެ.
ބައްދަލުވުމުގެ އެޖެންޑާ ބައްދަލުވުމުގެ ޔައުމިއްޔާ ބައްދަލުވުމުގެ ޚާޒިރީ© 2024 ރައްޔިތުންގެ މަޖިލިސްގެ އިދާރާA