މިއަދުގެ ބައްދަލުވުމުގައި ފުރަތަމަ ކުރިއަށް ގެންދެވީ ސަރުކާރުގެ ފަރާތުން، މާފަންނު ހުޅަނގު ދާއިރާގެ މެންބަރު މުޙައްމަދު މުޞްޠަފާ އިބްރާހީމް ހުށަހަޅުއްވާފައިވާ ޤާނޫނު ނަންބަރު 2011/10 (މުދަލާއި ޚިދުމަތުގެ އަގުން ޓެކްސް ނެގުމުގެ ޤާނޫނު) އަށް އިޞްލާޙު ގެނައުމުގެ ބިލު ދިރާސާކުރުމުގެ މަސައްކަތެވެ. އެގޮތުން، ބިލުގެ 1 ވަނަ މާއްދާ އިން ފެށިގެން ބިލުގެ ނިޔަލަށް ދިރާސާކުރެއްވިއެވެ. އެގޮތުން އިދާރާތަކުން ބިލަށް ހުށަހަޅާފައިވާ އިޞްލާޙުތަކުގެ ތެރެއިން މޯލްޑިވްސް އިންލަންޑް ރެވެނިއު އޮތޯރިޓީން ހުށަހަޅުއްވާފައިވާ އިޞްލާޙުތަކަށް ރިޢާއަތްކޮށް ބިލުގެ 1 ވަނަ މާއްދާ އަދި 2 ވަނަ މާއްދާ އިޞްލާޙުކުރައްވައި، ޤާނޫނުގެ 15 ވަނަ މާއްދާގެ (ހ) ގެ 2 ވަނަ ނަންބަރު ގައި ދީފައިވާ އިސްތިސްނާގެ ތެރެއަށް ކެފޭ ހިމަނައި އެ މާއްދާ އިޞްލާޙުކުރުމަށް ބިލަށް މާއްދާއެއް އިތުރުކުރުމަށް ވެސް ނިންމެވިއެވެ.

ބިލަށް ކޮމިޓީން ގެންނެވި އިޞްލާޙުތަކަށް ފަހު، ބިލު ކޮމިޓީން ފާސްކުރުމަށް ހުޅުވާލި ފުރުޞަތުގައި، ބިލަށް ހުށަހެޅުނު އިޞްލާޙުތަކާއި އެކު މުޅި ބިލު ފާސްކުރުމަށް ބާރަށު ދާއިރާގެ މެންބަރު އިބްރާހީމް ޝުޖާޢު ހުށަހަޅުއްވައި ކެނދިކުޅުދޫ ދާއިރާގެ މެންބަރު މުޙައްމަދު ޢަފޫ ޙާމިދު ތާއީދުކުރެއްވިއެވެ. މި ހުށަހެޅުން ކޮމިޓީއަށް އެވަގުތު ހާޒިރުވެވަޑައިގެން ވޯޓުގައި ބައިވެރިވެވަޑައިގެންނެވި މެންބަރުންގެ އިއްތިފާޤުން ފާސްވިއެވެ.

ދެން ކުރިއަށް ގެންދެވީ، ޤާނޫނު ނަންބަރު 99/2 (ދިވެހިރާއްޖޭގެ ޓޫރިޒަމާބެހޭ ޤާނޫނު) އަށް އިޞްލާޙު ގެނައުމުގެ ބިލުގެ މަސައްކަތެވެ. އެގޮތުން ހުޅުވާލި ފުރުޞަތުގައި، ކޮމިޓީއަށް ފޮނުވިފައިވާ ގޮތައް ބިލު ފާސްކުރުމަށް ބާރަށު ދާއިރާގެ މެންބަރު އިބްރާހީމް ޝުޖާޢު ހުށަހަޅުއްވައި މައްޗަންގޮޅި މެދު ދާއިރާގެ މެންބަރު އަޙްމަދު ޟަމީރު ތާއީދުކުރެއްވިއެވެ. މި ހުށަހެޅުން ކޮމިޓީއަށް އެވަގުތު ހާޒިރުވެވަޑައިގެން ވޯޓުގައި ބައިވެރިވެވަޑައިގެންނެވި މެންބަރުންގެ އަޢްލަބިއްޔަތުން ފާސްވިއެވެ.

އެއަށްފަހު، ކުރިއަށް ގެންދެވީ ޤާނޫނު ނަންބަރު 2016/29 (ދިވެހިރާއްޖޭގެ އެއަރޕޯޓަކުން ދިވެހިރާއްޖޭން ބޭރަށް ފުރާ ފަސިންޖަރުންގެ އަތުން ޓެކްސްއާއި ފީ ނެގުމާބެހޭ ޤާނޫނު) އަށް އިޞްލާޙު ގެނައުމުގެ ބިލު ދިރާސާރުމުގެ މަސައްކަތެވެ. އެގޮތުން، ހުޅުވާލި ފުރުޞަތުގައި ކޮމިޓީއަށް ފޮނުވިފައިވާ ގޮތައް ބިލު ފާސްކުރުމަށް ބާރަށު ދާއިރާގެ މެންބަރު އިބްރާހީމް ޝުޖާޢު ހުށަހަޅުއްވައި ކެލާ ދާއިރާގެ މެންބަރު ޢަބްދުﷲ ޝަރީފް ތާއީދުކުރެއްވިއެވެ. މި ހުށަހެޅުން ކޮމިޓީއަށް އެވަގުތު ހާޒިރުވެވަޑައިގެން ވޯޓުގައި ބައިވެރިވެވަޑައިގެންނެވި މެންބަރުންގެ އަޢްލަބިއްޔަތުން ފާސްވިއެވެ.

ފަހު ކަމަކަށް ކުރިއަށް ގެންދެވީ، ޤާނޫނު ނަންބަރު 79/31 (ދިވެހިރާއްޖޭގެ އެކްސްޕޯޓް އިމްޕޯޓްގެ ޤާނޫނު) އަށް އިޞްލާޙު ގެނައުމުގެ ބިލު ދިރާސާކުރުމުގެ މަސައްކަތެވެ. އެގޮތުން، ބިލުގެ 2 ވަނަ މާއްދާ 4 ވަނަ މާއްދާއަށް ކޮމިޓީން އިޞްލާޙުގެންނެވިއެވެ.

ބިލަށް ކޮމިޓީން ގެންނެވި އިޞްލާޙުތަކަށް ފަހު، ބިލު ކޮމިޓީން ފާސްކުރުމަށް ހުޅުވާލި ފުރުޞަތުގައި، ބިލަށް ހުށަހެޅުނު އިޞްލާޙުތަކާއި އެކު މުޅި ބިލު ފާސްކުރުމަށް ބާރަށު ދާއިރާގެ މެންބަރު އިބްރާހީމް ޝުޖާޢު ހުށަހަޅުއްވައި މައްޗަންގޮޅި މެދު ދާއިރާގެ މެންބަރު އަޙްމަދު ޟަމީރު ތާއީދުކުރެއްވިއެވެ. މި ހުށަހެޅުން ކޮމިޓީއަށް އެވަގުތު ހާޒިރުވެވަޑައިގެން ވޯޓުގައި ބައިވެރިވެވަޑައިގެންނެވި މެންބަރުންގެ އަޢްލަބިއްޔަތުން ފާސްވިއެވެ.

މި ބައްދަލުވުމުގައި ހުށަހެޅުނު ހުށަހެޅުއްވުންތަކަށް މެންބަރުން ވޯޓު ދެއްވިގޮތުގެ ތަފްޞީލު "ބައްދަލުވުމުގައި ނެގުނު ވޯޓުތައް" ބައިގައި އެވަނީއެވެ.