މިއަދުގެ ބައްދަލުވުމުގައި ފުރަތަމަ އޮތީ ކޮމިޓީގެ ކޮމިޓީގެ ވޯޓިންގ ކޯރަމް ކަނޑައެޅުމެވެ. އެ ގޮތުން، ކޮމިޓީގެ ވޯޓިންގ ކޯރަމްއަކީ 3 މެންބަރުންކަމުގައި ކަނޑައެޅުމަށް ގައްދޫ ދާއިރާގެ މެންބަރު މުޙައްމަދު ޢަލީ ހުށަހަޅުއްވިއެވެ. މި ހުށަހެޅުއްވުމަށް ކިނބިދޫ ދާއިރާގެ މެންބަރު ޢަލީ އަޝްރަޤް ތާޢީދުކުރެއްވިއެވެ. މި ހުށަހެޅުއްވުމަށް ހާޒިރުވެވަޑައިގެން ތިއްބެވި އެއްވެސް މެންބަރަކު އިއުތިރާޒުކޮށްފައިނުވާތީ އެގޮތަށް ނިންމެވިއެވެ.

އެއަށްފަހު، ސަރުކާރު ޙިއްޞާވާ ކުންފުނިތަކުގެ ކުރީގެ މެނޭޖްމަންޓުން ހިންގާފައިވާ ކޮރަޕްޝަންގެ ޢަމަލުތަކާއި، އެފަދަ ޢަމަލުތައް ތަކުރާރުވިޔަ ނުދިނުމަށް އަޅާފައިވާ ފިޔަވަޅުތައް ބެލުމަށް ހުށަހަޅުއްވާފައިވާ މައްސަލާގައި، ސްޓޭޓް އިލެކްޓްރިކް ކޮމްޕެނީ ލިމިޓެޑް ލިބިފައިވާ މަޢުލޫމާތުތައް ދިރާސާކުރެއްވިއެވެ. އެގޮތުން، ސްޓޭޓް އިލެކްޓްރިކް ކޮމްޕެނީ ލިމިޓެޑު (ސްޓެލްކޯ) ގެ ކުރީގެ މެނޭޖްމަންޓުން، ޗައިނާގެ ޑޮންގްފަންގް އިލެކްޓްރިކް އިންޓަރނޭޝަނަލް ކޯޕަރޭޝަނަށް (DEC) 14 ސެޕްޓެންބަރު 2023 ގައި ބަދަލުގެ ގޮތުގައި 7,888,165.97 (ހަތްލިމިއަން އަށްލައްކަ އަށްޑިހަ އަށްހާސް އެއްސަތޭކަ ފަސްދޮޅަސް ފަހެއް ޕޮއިންޓް ނުވައެއް ހަތެއް) އެމެރިކާ ޑޮލަރު ދިނުމަށް އެއްބަސްވެ، މިނިސްޓްރީ އޮފް ފިނޭންސްގެ އެންގެވުމާ ޚިލާފަށް ސެޓްލްމަންޓް އެގްރީމަންޓެއްގައި ސޮއިކޮށްފައިވާއިރު، އެ އެގްރީމަންޓްގެ ދަށުން ދޭންޖެހޭ ފައިސާ ދިނުން އެ ކުންފުނީގެ މިހާރުގެ މެނޭޖްމަންޓުން މެދުކަނޑާލާފައިވާތީ، އެންޓި-ކޮރަޕްޝަން ކޮމިޝަނާއި ސްޓޭޓް އިލެކްޓްރިކް ކޮމްޕެނީ ލިމިޓެޑަށް އަންނަނިވި ލަފާތައް ދިނުމަށް ގައްދޫ ދާއިރާގެ މެންބަރު މުޙައްމަދު ޢަލީ ހުށަހަޅުއްވައި މާވަށު ދާއިރާގެ މެންބަރު އަޙްމަދު ޝާކިރު ތާޢީދުކުރެއްވިއެވެ.

1. އިސްވެ ދެންނެވުނު މައްސަލަ ތަޙްޤީޤުކުރުމަށް އެންޓި-ކޮރަޕްޝަން ކޮމިޝަނަށް ހުށަހަޅުއްވާފައިވާކަމަށް ސްޓެލްކޯއިން މަޢުލޫމާތު ދެއްވާފައިވާތީ، މި މައްސަލައިގައި ސްޓެލްކޯއިން ޢަމަލުކުރަންވީ ގޮތެއް ނިންމުމަށްފަހު ވީހާވެސް އަވަހަކަށް އެ ކުންފުންޏަށް އެންގުމަށް އެންޓި-ކޮރަޕްޝަން ކޮމިޝަނަށް ދެންނެވުމަށް ފެންނަކަމަށް؛ އަދި،

2.  ސެޓްލްމަންޓް އެގްރީމަންޓުގެ ދަށުން 36 މަހަށް ބަހާލައިގެން ސްޓެލްކޯއިން ދައްކަން އެއްބަސްވެފައިވާ 219,115.72 (ދެލައްކަ ނަވާރަހާސް ސަތޭކަ ފަނަރަ ޕޮއިންޓް ހަތެއް ދޭއް) އެމެރިކާ ޑޮލަރު ދެއްކުން އެ ކުންފުނިން މިވަގުތަށް ހުއްޓާލާފައިވާއިރު، ނުދައްކާ ހުރި ޢަދަދަށް ކޮންމެ މަހަކު ވެސް ޖޫރިމަނާ އިތުރުވަމުންދާތީ، ކުންފުންޏަށް ލިބޭ މާލީ ގެއްލުން ކުޑަ ކުރުމަށް، އެގްރީމަންޓް ބާޠިލްކުރުމާ ގުޅޭގޮތުން ވަކިގޮތެއް ވީހާވެސް އަވަހަކަށް ނިންމުމަށް އެ ކުންފުނީގެ ބޯޑަށް ދެންނެވުމަށް ފެންނަކަމަށް.

މި ހުށަހެޅުމަށް މެންބަރުން ވޯޓު ދެއްވިގޮތުގެ ތަފްޞީލު ތިރީގައިއެވަނީއެވެ.

ވޯޓު: މަތީގައިވާ ނިންމުންތައް ނިންމެވުމަށް މައިކޮމިޓީއަށް ފޮނުއްވުމަށް.

ކޮމިޓީގެ ޖުމްލަ މެންބަރުންގެ ޢަދަދު :04

ހާޒިރުވެ ތިއްބެވި މެންބަރުންގެ ޢަދަދު: 04

ފެންނަކަމަށް ވޯޓު ދެއްވި މެންބަރުންގެ ޢަދަދު : 03

ނުފެންނަކަމަށް ވޯޓު ދެއްވި ޢަދަދު: 0

ވަކި ގޮތަކަށް ވޯޓުދޭން ބޭނުންނުވާ މެންބަރުންގެ ޢަދަދު: 0

ވޯޓުގައި ބައިވެރިވި މެންބަރުންގެ ޢަދަދު: 03

ފާސްވުމަށް ބޭނުންވާ ޢަދަދު: 02

ނިންމުން: ހުށަހެޅުން ފާސްވެފައި.

ދެން އަންނަ ބައްދަލުވުމެއްގައި ސަރުކާރު ޙިއްޞާވާ ކުންފުނިތަކުގެ ކުރީގެ މެނޭޖްމަންޓުން ހިންގާފައިވާ ކޮރަޕްޝަންގެ ޢަމަލުތަކާއި، އެފަދަ ޢަމަލުތައް ތަކުރާރުވިޔަ ނުދިނުމަށް އަޅާފައިވާ ފިޔަވަޅުތައް ބެލުމަށް ހުށަހަޅުއްވާފައިވާ މައްސަލާގައި، ފެނަކަ ކޯޕަރޭޝަން ލިމިޓެޑް އަދި ވޭސްޓް މެނޭޖްމަންޓް ކޯޕަރޭޝަނުން ފޮނުއްވާފައިވާ މަޢުލޫމާތު ދިރާސާކުރެއްވުމަށް ނިންމަވައި، މިއަދުގެ ކޮމިޓީ ނިންމާލިއެވެ.