މިއަދުގެ ބައްދަލުވުމުގައި ލޯކަލް ކައުންސިލްތަކުގެ މެންބަރުންގެ މުސާރައާއި ޢިނާޔަތްތައް މުރާޖަޢާކޮށް ރައްޔިތުންގެ މަޖިލީހުން ފާސްކުރިއިރު އަތޮޅު ކައުންސިލްތަކުގެ ނައިބު ރައީސުންގެ ގޮތުގައި ޢައްޔަނުކުރާ ފަރާތަށާއި އަދި އަތޮޅު ކައުންސިލްގެ ޢާންމު މެންބަރުންގެ ގޮތުގައި ތިއްބަވާ ފަރާތްތަކުގެ މުސާރައާއި ޢިނާޔަތުގައި އެއްވެސް ފަރަޤެއް ނެތްކަމަށާއި، އަތޮޅު ކައުންސިލްތަކުގެ ރައީސް ނެތް ޙާލަތުގައި ރައީސްގެ އެންމެހައި މަސްއޫލިއްޔަތުތައް އަދާކުރައްވަންޖެހެނީ ނައިބު ރައީސްކަމުން، އެހެން މެންބަރުންނާއި ނައިބު ރައީސްގެ މުސާރައާއި ޢިނާޔަތްތަކުގައި ފަރަޤެއް ހުންނަންޖެހޭނެކަމަށް ބަޔާންކުރައްވައި ލޯކަލް ގަވަރމަންޓް އޮތޯރިޓީން 05 މޭ 2021 ގައި ފޮނުއްވާފައިވާ ސިޓީ މަޝްވަރާ ކުރައްވައި، އަތޮޅު ކައުންސިލްގެ ނައިބް ރައީސް ކަމަށް ހޮވޭ ބޭފުޅާއަށް 1000 (އެއްހާސް) ރުފިޔާގެ އެލަވަންސެއް ދެއްވުމަށް ހަނިމާދޫ ދާއިރާގެ މެންބަރު ޢަބްދުލްޣަފޫރު މޫސާ ހުށަހަޅުއްވައި، މަރަދޫ ދާއިރާގެ މެންބަރު އިބްރާހީމް ޝަރީފް ތަޢީދު ކުރައްވައި ކޮމިޓީގެ އަޤްލަބިއްޔަތުން ފާސްވެފައިވެއެވެ. ދިވެހިރާއްޖޭގެ އިންޝުއަރެންސް ކުންފުނިތަކުން "ޕޮލިސީ" ވިއްކައިގެން ދިވެހި ރައްޔިތުންގެ އަތުން ޙީލަތްތެރި ގޮތެއްގައި މަންފާ ހޯދާކަމަށާއި، ސްޓޭޓް ޓްރޭޑިންގ އޯގަނައިޒޭޝަން (އެސް.ޓީ.އޯ) ގެ ސަބްސިޑިއަރީ ކުންފުންޏެއް ކަމުގައިވާ އިންޝުއަރެންސް ކޮމްޕެނީގެ ތެރެއިން އިތުރު ކުންފުންޏެއް "ދިވެހި އިންޝިއުރެންސް ކޮންޕެނީ"ގެ ނަމުގައި އުފަންކޮށް، އެކުންފުނިންވެސް ދިވެހި ރައްޔިތުންނަށް މަކަރާއި ޚީލަތް ހަދަމުންދާ ކަމުގެ އަޑުތައް އިވެމުންދާކަމަށް ކާށިދޫ ދާއިރާގެ މެންބަރު ޢަބްދުﷲ ޖާބިރު ހުށަހަޅުއްވާފައިވާ މައްސަލައިގެ އިތުރު މަޢުލޫމާތު މޯލްޑިވްސް މަނިޓަރީ އޮތޯރިޓީ އަދި އެލައިޑް އިންޝުއަރެންސް އިން ހޯދަމަށްފަހު މައްސަލަ އިތުރަށް ބެއްލެވުމަށް ނިންމާފައިވެއެވެ. މާލިއްޔަތު ކޮމިޓީއާއި ލާމަރުކަޒީ ކޮމިޓީގެ ޖޮއިންޓް ކޮމިޓީން ދިރާސާކުރެއްވުމަށް ފޮނުވާފައިވާ ޤާނޫނު ނަންބަރު 3/2006 (ދައުލަތުގެ މާލިއްޔަތުގެ ޤާނޫނު) އަށް އިޞްލާޙު ގެނައުމަށް ދާންދޫ ދާއިރާގެ މެންބަރު ޔަޢުޤޫބު ޢަބްދުﷲ ހުށަހަޅުއްވާފައިވާ ބިލް ލާމަރިކަޒީ ކޮމިޓީއާއެކު ޖޮއިންޓް ކޮމިޓީއެއްގައި ކުރިއަށް ގެންދިއުމަށް ނިންމާފައިވެއެވެ.