މިއަދުގެ ބައްދަލުވުމުގައި، ކުރިއަށް ގެންދެވީ ދިވެހިރާއްޖޭގެ މުވާޞަލާތީ ޚިދުމަތްތައް ބެލެހެއްޓުމުގެ ޒިންމާ ޙަވާލުކުރެވިފައިވާ ފަރާތުން، ނުހަނު ދިގު މުއްދަތަކަށް ދިވެހިރާއްޖޭގައި ހަދާފައިވާ ޤާނޫނުތަކަށް ބެލުމެއްނެތި، ޓެލެކޮމް އޮޕަރޭޓަރުންގެ މަންފާއަށް ފަހިވާގޮތަކަށް، ރައްޔިތުންނަށް ނުހަނު ގެއްލުންވަމުންދާ މަގުން، ގިނަގުނަ ކަންތައްތަކެއް ތަރުތީބުކޮށްފައިވާކަމަށް ފާހަގަކުރައްވައި، އެ ކަންކަން ނިމުމަކަށް ގެނައުމަށް ގޮވާލައްވައި ހުށަހަޅުއްވާފައިވާ ޤަރާރާ ގުޅޭގޮތުން ސަބް-ކޮމިޓީން ފޮނުއްވާފައިވާ ރިޕޯޓު ދިރާސާކުރެއްވުމެވެ. އެގޮތުން ވޯޓުގައި ބައިވެރިވެވަޑައިގެންނެވި މެންބަރުންގެ އިއްތިފާޤުން ޤަރާރު ފާސްކުރައްވައި މަޖިލީހުގެ ތަޅުމަށް ފޮނުވުމަށް ނިންމެވިއެވެ. ދެން މި ބައްދަލުވުމުގައި ކުރިއަށް ގެންދެވީ އިލެކްޓްރޯނިކް މުޢާމަލާތްތަކާބެހޭ ބިލު ދިރާސާކުރެއްވުމެވެ. އެގޮތުން ބިލުގެ 1 ވަނަ މާއްދާއިން ފެށިގެން 3 ވަނަ މާއްދާގެ ނިޔަލަށް ދިރާސާކުރެއްވިއެވެ.