މި ބައްދަލުވުމުގައި ކުރިއަށް ގެންދެވީ އިލެކްޓްރޯނިކް މުޢާމަލާތްތަކާބެހޭ ބިލު ދިރާސާކުރެއްވުމުގެ މަސައްކަތެވެ. އެގޮތުން، އެ ބިލުގެ 32 ވަނަ މާއްދާއިން ފެށިގެން 34 ވަނަ މާއްދާގެ ނިޔަލަށް ކޮމިޓީން ދިރާސާކުރެއްވިއެވެ. އެއަށްފަހު، އެ ބިލަށް ކޮމިޓީން ގެންނެވި އިޞްލާޙުތަކާއެކު ބިލު ފާސްކުރެއްވުމަށް ވޯޓުގައި ބައިވެރިވެވަޑައިގެންނެވި މެންބަރުންގެ އިއްތިފާޤުން ނިންމެވިއެވެ. އަދި މި ބައްދަލުވުމުގައި، ސަރުކާރުން ކުރިއަށްގެންދަވާ ބޯހިޔާވަހިކަމުގެ މަޝްރޫޢުތަކާގުޅޭ އެންމެ ފަހުގެ މަޢުލޫމާތު ހޯއްދެވުމަށް މިނިސްޓްރީ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރގެ ބޭފުޅުންނާ ކޮމިޓީން ބައްދަލުކުރެއްވުމަށް ދިއްގަރު ދާއިރާގެ މެންބަރު އިކްރާމް ޙަސަން ހުށަހެޅުއްވުމުން ހޮޅުދޫ ދާއިރާގެ މެންބަރު ޔޫނުސް ޢަލީ އެ ހުށަހެޅުމަށް ތާޢީދުކުރައްވާފައިވެއެވެ. އެ ހުށަހެޅުން ވޯޓުގައި ބައިވެރިވެވަޑައިގެންނެވި މެންބަރުންގެ އިއްތިފާޤުން ފާސްކުރައްވައި، މިނިސްޓްރީގެ ބޭފުޅުންނާއެކު ބައްދަލުކުރެއްވުމަށް ނިންމެވިއެވެ.
© 2024 ރައްޔިތުންގެ މަޖިލިސްގެ އިދާރާA