މިއަދުގެ ބައްދަލުވުމުގައި ބާ އިމްތިހާނުގައި ބައިވެރިވުމުގެ ފީއެއްގެ ގޮތުގައި 10،000 (ދިހަހާސް) ރުފިޔާ ބާ ކައުންސިލުން ކަނޑައަޅުއްވާފައިވާތީ، ވިލިމާލެ ދާއިރާގެ މެންބަރު އަޙްމަދު އުޝާމް ފޮނުއްވާފައިވާ ސިޓީ އާ ގުޅޭގޮތުން މަޝްވަރާކުރެއްވުމަށްފަހު، އެ އަދަދު ކަނޑައެޅުއްވުމުގައި ބައްލަވާފައިވާ ކަންކަމުގެ ތަފްޞީލީ މައުލޫމާތު ބާ ކައުންސިލުން ފޮނުއްވާފައިވާތީ، އެ ސިޓީގައިވާ މައުލޫމާތަށް ބައްލަވާ ބާ ކައުންސިލަށް އަލަށް އިންތިޙާބުވެވަޑައިގެންނެވި މެންބަރުންނާ ބައްދަލުކޮށް މައުލޫމާތު ސާފުކުރެއްވުމަށް ކޮމިޓީން ނިންމިއެވެ. އެއަށްފަހު، ހެއްކާބެހޭ ބިލު ދިރާސާކުރެއްވުމުގެ މަސައްކަތްކުރެއްވިއެވެ. އެގޮތުން ބިލުގެ 109 ވަނަ މާއްދާއިން ފެށިގެން 134 ވަނަ މާއްދާގެ ނިޔަލަށް ބެއްލެވިއެވެ.