މިއަދުގެ ބައްދަލުވުމުގައި ކޮމިޓީގައި ނުނިމި ހުރި މައްސަލަތަކާމެދު މަޝްވަރާކުރެއްވިއެވެ. އެގޮތުން މިނިސްޓްރީ އޮފް ހެލްތްގެ ރެކްރޫމެންޓް އުސޫލުތައް ޤާނޫނުގެ ދައިރާއިން ބޭރުން އެކުލަވާލެވިފައިވާކަން ބަޔާންކޮށް މޯލްޑިވްސް އެސޯސިއޭޝަން ފޯރ އެމްޕްލޯއީމެންޓް އޭޖެންސީން ފޮނުއްވާފައިވާ މައްސަލައާ ގުޅޭގޮތުން މަޝްވަރާކުރުމަށްފަހު އެ މައްސަލައިގައި ބަޔާންކޮށްފައިވާ އުސޫލު 2023 ވަނަ އަހަރު އިޞްލާޙުކޮށް ޢާންމު ކޮށްފައިވާތީއާއި، މި އުސޫލު އިޞްލާޙުވެގެން އައިއިރު މައްސަލަ ހުށަހެޅުއްވި ފަރާތުގެ ކަންބޮޑުވުންތަކަށް އެޑްރެސްކުރެވިފައިވާތީ، ކޮމިޓީއަށް ވަޑައިގެންނެވި އެއްވެސް މެންބަރަކު އިޢުތިރާޟްނުކުރައްވާތީ، އެ މައްސަލަ ފައިލްކުރުމަށް ނިންމެވިއެވެ. އެއަށްފަހު، ޤާނޫނު ނަންބަރު 2009/5 (އެއްގަމު ދަތުރުފަތުރުގެ ޤާނޫނު) ގެ ދަށުން އެއްގަމު އުޅަނދުތައް ރަޖިސްޓަރީކުރުމާއި އެއްގަމު އުޅަނދުގެ ތާރޑް ޕާޓީ އިންޝުއަރެންސް ކުރުން، އަދި އެއްގަމު އުޅަނދުގެ ޢަދަދު ކޮންޓްރޯލްކުރުމާ ގުޅޭގޮތުން ޢަމަލުކުރަމުންދާ އުސޫލަކީ ކޮބައިކަން ސާފުކުރެއްވުމަށް މިނިސްޓްރީ އޮފް ޓްރާންސްޕޯޓް އެންޑް ސިވިލް އޭވިއޭޝަންގެ ބޭފުޅުންނާ ބައްދަލުކުރެއްވުމަށް ކޮމިޓީން ނިންމެވިއެވެ.