މިއަދުގެ ބައްދަލުވުމުގައި ކުރިއަށް ގެންދެވީ ޤާނޫނު ނަންބަރު 5/2009 (އެއްގަމު ދަތުރުފަތުރުގެ ޤާނޫނު) އަށް އިޞްލާޙު ގެނައުމުގެ ބިލުން ނުނިމި ހުރި މާއްދާތައް ދިރާސާކުރެއްވުމުގެ މަސައްކަތެވެ. އެގޮތުން ޤާނޫނު ނަންބަރު 5/2009 (އެއްގަމު ދަތުރުފަތުރުގެ ޤާނޫނު) ގެ 14 ވަނަ މާއްދާގެ (ހ)، (ށ)، (ނ) އަދި (ރ) ކޮމިޓީން ފާސްކުރެއްވިއެވެ. ދެން މި ބައްދަލުވުމުގައި ކުރިއަށް ގެންދެވީ އެއްމެދު ޢިމާރާތުގެ ބިލު ސުންގަޑި ކަނޑައެޅުއްވުމުގެ މަސައްކަތެވެ. އެ ގޮތުން ދިއްގަރު ދާއިރާގެ މެންބަރު އިކްރާމް ޙަސަން ހުށަހަޅުއްވާ ހޮޅުދޫ ދާއިރާގެ މެންބަރު ޔޫނުސް ޢަލީ ތާއީދު ކުރެއްވީ މި ބިލުގެ ސުންގަނޑިއަކީ 22 ޖުލައި 2020 ކަމުގައިއެވެ. މި ހުށަހެޅުއްވުން ކޮމިޓީގެ އިއްތިފާގުން ފާސްކުރެއްވިއެވެ. މީގެ އިތުރުން، ގޯތިގެދޮރު ކުއްޔަށް ދިނުމާބެހޭ ބިލާއި އެއްމެދު ޢިމާރާތުގެ ބިލާ ގުޅޭގޮތުން އިތުރު މަޢުލޫމާތު ސާފުކުރެއްވުމަށް ކަމާ ގުޅުންހުރި 7 އިދާރާއަކުން ލިޔުމުން އިޞްލާހު ހުށަހެޅުއްވުންއެދި ސިޓީ ފޮނުއްވުމަށް ފާސްކުރެއްވިއެވެ. އެއީ، މިނިސްޓްރީ އޮފް ހައުސިންގް އެންޑް އަރބަން ޑިވެލޮޕްމަންޓް، މިނިސްޓްރީ އޮފް ނޭޝަނަލް ޕްލޭނިންގ އެންޑް އިންފްރާސްޓްރަކްޗަރ، ހައުސިންގ ޑިވެލޮޕްމަންޓް ކޯޕަރޭޝަން، މާލެ ސިޓީ ކައުންސިލް، މޯލްޑިވްސް ނެޝަނަލް އެސޯސިއޭޝަން އޮފް ކޮންސްޓްރަކްޝަން އިންޑަސްޓްރީ، އަމީން ކޮންސްޓްރަކްޝަން ޕްރައިވެޓް ލިމިޓެޑް އަދި ރަޝީދު ކާރޕެންޓްރީ އެންޑް ކޮންސްޓްރަކްޝަން ޕްރައިވެޓް ލިމިޓެޑެވެ.
© 2024 ރައްޔިތުންގެ މަޖިލިސްގެ އިދާރާA