- އެންމެ ފުރަތަމަ ކަމަކަށް، މުސްތަޤިއްލު މުއައްސަސާތަކުގެ މެންބަރުންނާއި މުސްތަޤިއްލު މަޤާމުތަކުގައި ތިބޭ މީހުން މަޤާމުން ވަކިކުރުމުގެ މައްސަލަ ކޮމިޓީން ދިރާސާކުރުމުގައި ޢަމަލުކުރާނެ އުސޫލާ ގުޅޭގޮތުން މަޝްވަރާކޮށް، އެ އުސޫލު ކޮމިޓީއަށް އެވަގުތު ހާޒިރުވެ ވޯޓުގައި ބައިވެރިވި މެންބަރުންގެ ޢިއްތިފާޤުން ފާސްކުރެއްވިއެވެ. - ދެވަނަ ކަމަކަށް ކޮމިޓީން ނިންމެވީ އައިމާ ކޮންސްޓްރަކްޝަންގެ ބިދޭސީ މުވައްޒަފުންތަކަކަށް އެމީހުންނަށް ލިބިދޭންޖެހޭ ހައްޤުތަކެއް ކަށަވަރުކޮށްދިނުމެއް ނެތި އެމީހުންގެ ޤައުމަށް ފޮނުވާލި ކަމަށްބުނާ މައްސަލައާ ގުޅިގެން ޓްރާންސްޕޭރެންސީ މޯލްޑިވްސްއާ ބައްދަލުކުރެއްވުމަށެވެ. - ދެން ކޮމިޓީން ނިންމެވީ ކޮމިޓީއަށް ހުށަހެޅިފައިވާ ޤާނޫނު ނަންބަރު 6/2006 (ހިޔުމަން ރައިޓްސް ކޮމިޝަނުގެ ޤާނޫނު) އަށް އިޞްލާޙުގެނައުމުގެ ބިލާއި، އިންތިޤާލީ އިންޞާފުގެ ބިލުގެ މަސައްކަތް ނިންމުމުގެ ސުންގަޑީގެ ގޮތުގައި 1 މަސްދުވަސް ދިނުމަށެވެ. - މީގެއިތުރުން، ކޮމިޓީއަށް ހުށަހެޅިފައިވާ ގދ. އަތޮޅު ރަށެއްގެ 4 އަންހެންކުދިންނަށް ޖިންސީގޯނާ ކުރި މައްސަލައާއި، ގދ. ތިނަދޫގައި އަނބިމީހާއަށް އަނިޔާކޮށް، އެ އަނިޔާއަށް ފަރުވާ ހޯދަމުން ދަނިކޮށް ނިޔާވި މައްސަލަ ކޯޓުގައި އިސްތިއުނާފްކޮށްފައިވާތީ، އެ ދެ މައްސަލަ ކޮމިޓީން ދިރާސާކޮށް ނިންމެވުމަށް ފާސްކުރެއްވިއެވެ. އެހެން ނަމަވެސް، ކޮމިޓީން އެ މައްސަލަ މޮނިޓަރކުރަމުންދާ މައްސަލައެއްގެ ގޮތުގައި ބޭއްވުމަށް ނިންމެވިއެވެ.