މިޖަލްސާގައި ވަނީ ރައްޔިތުންގެ މަޖިލީހަށް އަލަށް ހޮވި ވަޑައިގަތް މެންބަރުން ހުވާ ކުރެއްވުމަށްފަހު 19 ވަނަ މަޖިލީހުގެ ރައީސް އަދި ނާއިބު ރައީސް ހޮއްވަވާފައެވެ. އެގޮތުން މި ވޯޓް ލާފައިވަނީ ޤާނޫނުއަސާސީގެ ދަށުން ވަކި ދެ ސިއްރު ވޯޓެއްގެ ގޮތުގައެވެ. ރައީސް ނަޝީދު 19 ވަނަ ރައްޔިތުންގެ މަޖިލީހުގެ ރައީސްކަމަށް ހޮވިވަޑައިގަތީ މިދިޔަ ދައުރުގެ ރައީސް ގާސިމް އިބްރާހީމްއާއި ވާދަކުރައްވައި 67-17 ވޯޓުން އިންތިހާބު ކާމިޔާބުކުރައްވައިގެންނެވެ. މަޖިލީހުގެ ނައިބް ރައީސްގެ މަގާމަށް އިންތިޚާބުވެވަޑައިގެންނެވި އީވާ އަބްދުﷲ އަކީ އެ މަޤާމް ފުރުއްވާނެ ދެ ވަނަ އަންހެން މެމްބަރެވެ. އެ ޝަރަފް އެންމެ ފުރަތަމަ ލިބިވަޑައިގަތީ އޮގަސްޓް 2008 އިން މޭ 2009 ގެ ނިޔަލަށް ނައިބް ރައީސްކަން ކުރެއްވި އަނީސާ އަހުމަދަށެވެ.