މިއަދުގެ ބައްދަލުވުމުގައި ޖުޑީޝަލް ސަރވިސް ކޮމިޝަނުން ތަޙްޤީޤުކުރައްވާ ފޮނުއްވާފައިވާ ރިޕޯޓްތައް ދިރާސާކޮށް ނިންމަވާނެ ސުންގަޑިއަކީ 18 މާރިޗް 2020 ކަމުގައި، ކޮމިޓީއަށް ވަޑައިގެންނެވި މެންބަރުންގެ އިއްތިފާޤުން ނިންމެވިއެވެ. މީގެއިތުރުން ކްރިމިނަލް ކޯޓުން ނިންމާ މައްސަލަތަކާ ގުޅިގެން، އެ ކޯޓުގެ "މައްސަލައަކާ ގުޅޭގޮތުން ރެކޯޑިންގ އަޑުއެހުމާއި ބަޔާން ބެލުމާއި ބަޔާނުގެ ކޮޕީ ހެއްދުމަށް އެދި ހުށަހަޅާ ފޯމު" އިން ބަޔާނުގެ ކޮޕީ ހެއްދުމަށް އެދި ހުށަހެޅުމުން، އާންމުކޮށް ފޮޓޯކޮޕީގެ ޚިދުމަތް ދޭ ތަންތަނުން ނަގާ އަގަށްވުރެ އެތައް ގުނައެއް ބޮޑުކޮށް، ކޮންމެ ޞަފްޙާއަކަށް -/5 (ފަހެއް) ރުފިޔާގެ މަގުން އެ ކޯޓުން އަގު ނަގަމުންދާކަމުގެ ޝަކުވާއެއް ކޮމިޓީން ދިރާސާކުރައްވަމުން ގެންދަވާތީ، އަދި ޖުޑީޝަލް އެޑްމިނިސްޓްރޭޝަންއިން ފޮނުއްވާފައިވާ ސިޓީއަށް ރިޢާޔަތްކޮށް، ދިވެހިރާއްޖޭގެ ސުޕްރީމް ކޯޓުން ޝާއިޢުކޮށްފައިވާ "ޝަރީޢަތްކުރުމާބެހޭ ޖިނާއީ އިޖުރާއާތުގެ ގަވާއިދު" ގެ 157 ވަނަ މާއްދާގައި ބަޔާންކޮށްފައިވާ ފަދައިން ޝަރީޢަތުގައި ނަގާފައިވާ ބަޔާނެއްގެ ކޮޕީ ދޫކުރުމުގައި، ކޮންމެ ޞަފްޙާއަކަށް 5 (ފަހެއް) ރުފިޔާގެ މަގުން ފީއެއް ނެގުމަށް ބަޔާންކޮށްފައިވާތީ، އެކަމުގެ ސަބަބުން އިންޞާފަށް ވާޞިލުވުމަށް ކުރިމަތިވެގެންދާ ބޮޑު ތަކުލީފަކަށް ކުރިމަތިވާތީ މިކަން ބަޔާންކޮށް ޖުޑީޝަލް އެޑްމިނިސްޓްރޭޝަންއަށް ސިޓީ ފޮނުއްވުމަށް ނިންމެވިއެވެ.