މިނިވަން މުއައްސަސާތަކުގެ ކޮމިޓީ އުފައްދާފައިވަނީ 11 ޖޫން 2019 ގައި ބޭއްވި، 19 ވަނަ ރައްޔިތުންގެ މަޖިލީހުގެ 6 ވަނަ ޖަލްސާގައެވެ. މި ކޮމިޓީގެ މަސްއޫލިއްޔަތަކީ، ކޮމިޓީގެ މަސްއޫލިއްޔަތުގެ ދާއިރާގެ ތެރޭގައި ހިމެނޭ މިނިވަން މުއައްސަސާތަކުގެ ކަންކަން ދިރާސާކުރުމާއި، މިނިވަން މުއައްސަސާތަކުގެ ސިޔާސަތުތަކަށް ގެންނަންޖެހޭ ބަދަލެއް އޮތްނަމަ އެކަމެއް ފާހަގަކޮށް ރައްޔިތުންގެ މަޖިލީހަށް ހުށަހެޅުމާއި، މަޖިލީހުގެ ގަވާއިދުގެ 117 ވަނަ މާއްދާގެ (ހ) ގައި ބަޔާންކުރާ މިނިވަން މުއައްސަސާތަކުގެ މަސްއޫލިއްޔަތުތައް އެ މުއައްސަސާތަކުން އަދާކުރަމުންދާ މިންވަރު ބަލައި ދިރާސާކޮށް، އަޅަންޖެހޭ ފިޔަވަޅުތައް އެޅުމެވެ. މީގެއިތުރުން ޤާނޫނުއަސާސީއާއި ޤާނޫނުން އުފައްދާފައިވާ މިނިވަން މުއައްސަސާތަކާއި މުސްތަޤިއްލު މަޤާމުތަކުގެ ތެރެއިން އެހެން ކޮމިޓީއެއްގެ މަސްއޫލިއްޔަތުގެ ދާއިރާގައި ނުހިމެނޭ މިނިވަން މުއައްސަސާތަކުގައި ތިބޭ މެންބަރުންނާއި މުސްތަޤިއްލު މަޤާމުތަކުގައި ތިބޭ ފަރާތްތައް ޖަވާބުދާރީ ކުރުވުމާއި، އެ މުއައްސަސާތަކުގެ އަހަރީ ރިޕޯޓު ދިރާސާކުރުމާއި، އެ މުއައްސަސާތަކާ ގުޅޭގޮތުން ޢާންމުންނާއި އެހެނިހެން ފަރާތްތަކުން ހުށަހަޅާ މައްސަލަތައް ދިރާސާކޮށް، އެ ކަންކަމަށް އެޅިދާނެ ފިޔަވަޅުތަކާ ގުޅޭގޮތުން ލަފާދިނުމާއި، އެ މުއައްސަސާތަކުގެ ދާއިރާތަކުގެ ތެރޭގައި ހިމެނޭ ބިލުތައް ދިރާސާކޮށް މަޖިލީހަށް ހުށަހެޅުމާއި، މިނިވަން މުއައްސަސާތަކުގެ މެންބަރުކަމަށާއި މުސްތަޤިއްލު މަޤާމުތަކަށް ޢައްޔަންކުރާ ފަރާތްތަކުގެ ތެރެއިން ރައްޔިތުންގެ މަޖިލީހުން ރުހުން ހޯދަންޖެހޭ ފަރާތްތަކާ ގުޅޭގޮތުން މަޢުލޫމާތު ހޯދައި ދިރާސާކޮށް އިންޓަރވިއު ކުރުމާއި، މިނިވަން މުއައްސަސާތަކާ ބައްދަލުކޮށް އެތަންތަން ހިންގުމާ ގުޅޭގޮތުން މަޢުލޫމާތު ހޯދައި ސުވާލުކޮށް، އެތަންތަނުން ކުރަންޖެހޭ ކަންކަން ބަލައި، އިޞްލާހުކޮށްދޭންޖެހޭ ކަންކަން ބަޔާންކޮށްދިނުމާއި، މިނިވަން މުއައްސަސާތަކާއި މުސްތަޤިއްލު މަޤާމުތަކުގެ ތިބޭ ފަރާތްތަކުގެ ތެރެއިން މަޤާމުން ވަކިކުރަންޖެހޭ ފަރާތްތަކާ ގުޅޭގޮތުން މަޖިލީހަށް ލަފާ އެރުވުމެވެ.
© 2024 ރައްޔިތުންގެ މަޖިލިސްގެ އިދާރާA